Azərbaycanın elmi ictimaiyyətinə ağır itki üz verib – FOTO

AMEA-nın müxbir üzvü vəfat edib. 

Oxu.Az-ın məlumatına görə, kimya elminin inkişafında mühüm xidmətləri olmuş görkəmli alim, Əməkdar elm xadimi, AMEA-nın müxbir üzvü Nazil Fazil oğlu Canibəyov 2017-ci il may ayının 6-da ömrünün 75-ci ilində vəfat edib.

Professor N.Canibəyov neft kimyası sahəsində tanınmış alim idi. 

Nazil Canibəyov 1942‐ci il sentyabrın 21‐də Bakı şəhərində anadan olub. 1965-ci ildə Azərbaycan Dövlət Universitetinin Kimya fakültəsini bitirib. O, 1972-ci ildə kimya üzrə fəlsəfə doktoru, 1987-ci ildə kimya üzrə elmlər doktoru elmi dərəcəsini, 1994-cü ildə isə professor elmi adını alıb. 2007-ci ildə AMEA‐nın müxbir üzvü seçilib.

Alim əmək fəaliyyətinə 1965‐ci ildən Azərbaycan Elmlər Akademiyasının Y.Məmmədəliyev adına Neft‐Kimya Prosesləri İnstitutunda mühəndis kimi başlayıb, sonralar kiçik və böyük elmi işçi vəzifələrində çalışıb.

N.Canibəyov 1986‐cı ildən indiyə kimi Neft‐Kimya Prosesləri İnstitutunda Polifunksilonal kompleksonlar və metalkompleks birləşmələr laboratoriyasının müdiri vəzifəsində çalışıb. O, 2012‐ci ildən bu elmi müəssisədə Neft‐kimya sintezi şöbəsinin müdiri idi.

N.Canibəyov 224 elmi əsərin, o cümlədən 20 müəlliflik şəhadətnaməsi və 17 patentin müəllifi idi. Onun əsərlərinin çox hissəsi xaricdə çap olunub.

Allah rəhmət eləsin!

Z.Q.
www.oxu.az