“Azəriqaz”: “Cəmiyyətdə dolaşıq fikir yayanlar barədə ölçü götürülməlidir”
“Azəriqaz”: “Cəmiyyətdə dolaşıq fikir yayanlar barədə ölçü götürülməlidir”
“Azəriqaz” İstehsalat Birliyi koronavirus infeksiyasının yayıldığı bu günlərdə dolaşıq fikir yayan bəzi mətbuat orqanları barədə tədbir görülməsini istəyir.
Bu barədə qurumun açıqlamasında bildirilib.
“Bildiyimiz kimi, hazırda çox həssas dövrü yaşayırıq. Koronavirus infeksiyasının yayılmasının qarşısının alınması üçün hökumətin atdığı addımları, qəbul etdiyi qərar və tövsiyələri hər bir Azərbaycan vətəndaşı anlayışla qarşılamalıdır. Bu təhlükənin yarada biləcəyi fəsadlarla mübarizədə biz yalnız birlikdə güclü ola bilərik.
Belə bir dönəmdə “Azəriqaz” İstehsalat Birliyi az işçi qüvvəsi ilə çox iş görməyə çalışır ki, qaz təchizatında problemlər yaşanmasın. İnsanlar arasında bu infeksiyanın daha geniş yayılmaması üçün əmək haqları saxlanılmaqla, ümumi işçilərin 20%-i növbədənkənar məzuniyyətə göndərilib. Martın 29-dan etibarən isə 60-dan çox yaşı olan abonentlər üçün sosial aksiyaya start verilib və onların qaz təsərrüfatı ilə bağlı problemlərinin həllini səyyar qruplar həyata keçirir”, - deyə açıqlamada qeyd edilib.
Bildirilib ki, belə məqamda da vəziyyətdən istifadə etmək, əsassız sosial məsələləri şişirdərək narazılıqlar yaratmaq istəyən bəzi “media” qurumları və internet resurslarının fəaliyyəti başa düşülən deyil.
“Səhifələrində əlaqə koordinatları tapılmayan belə mənbələrin bəziləri Gəncə şəhərində çayxana işlədən Tural adlı bir şəxsin qazının kəsilməsi barədə məsələni qabardıb. Onun karantin rejiminin tətbiqinə dair etirazından yazıblar. Lakin həmin şəxsin koordinatlarını qeyd etməyiblər. Bu barədə Birliyimizdən də mövqe alınmayıb.
“Azəriqaz” İstehsalat Birliyinin Gəncə Regional Qaz İstismarı İdarəsi belə bir abonentin axtarışında olub, lakin fakt təsdiqini tapmayıb. Əgər bu barədə yazını hüquq-mühafizə orqanları araşdırarsa, bir olmağımızın vacib sayıldığı zamanda, “hökumət əleyhinə çağırışa səsləyir” kimi məsələlərə toxunulduğunun şahidi olarlar.
Belə mövzulardan yazanların diqqətinə çatdırmaq istərdik ki, “Azəriqaz” İstehsalat Birliyinin sosial şəbəkələrdəki ünvanlarına nəzər yetirsinlər. “Sosial aksiyadakı iştirakımızdan yazsınlar” demirik, sadəcə baxıb, onlar da ən azı bizim etdiyimizin 10%-i qədər təşəbbüslə çıxış etsinlər. İnanırıq ki, indiki ağır vəziyyətdə cəmiyyətimizdə fikir dolaşıqlığı yaradanlar barədə hüquq-mühafizə orqanları araşdırma aparacaq və tədbirlər görəcəklər”, - deyə açıqlamada qeyd olunub.