Koronavirusun yeni mutasiyaları daha yoluxucudur - ƏHALİYƏ ÇAĞIRIŞ

“Hazırda dünyada, xüsusilə bizim regionda və Azərbaycanda yoluxma dinamikasında artımı nəzərə alaraq, insanların sosial məsafə, qapalı məkanlarda mütləq maskadan istifadə, gigiyenik qaydalara əməl etməsi və peyvənd olunması tövsiyə olunur”.

Bunu “Report”a açıqlamasında həkim-infeksionist Səxavət Xəlilli deyib.

Onun sözlərinə görə, zaman keçdikcə vurulan peyvəndin qoruyuculuğunda azalma olur və buna görə də ikinci dozadan, təxminən, beş ay sonra buster (qüvvətləndirici) dozanın qəbulu ilə qoruyuculuğun dəfələrlə artması elmi araşdırmalarda sübut olunub:

“Buster dozanın daha uzunmüddətli qoruyucu olacağı düşünülür”.

“İngiltərədə elm adamları koronavirusun daha yoluxucu forması ola biləcək “AY.4.2” mutasiyasını izlədiklərini bildirirlər. Bu mutasiyanın dünyada yoluxmanın sürətlə artmasına səbəb olan “Delta” ştammından daha yoluxucu olduğu ehtimal olunur. İngiltərədə yoluxmanın çox olmasının və daha sürətlə artmasının səbəbi kimi “AY.4.2” mutasiyasının olması və yoluxanların 10 %-nin bu variantla yoluxduğu bildirilir. Xəstəliyin klinik əlamətlərində bu varianta spesifik olan hər hansısa fərqli simptom qeyd olunmur”, - mütəxəssis bildirib.

Qeyd edək ki, bir sıra ölkələrdə, o cümlədən qonşu Rusiyada COVID-19 infeksiyasının yeni “AY.4.2” mutasiyası qeydə alınıb. Həmin variantın “Delta” ştammı ilə müqayisədə daha yoluxucu olduğu, bir xəstənin təxminən doqquz nəfəri yoluxdura biləcəyi barədə məlumatlar var. Yeni mutasiyanın simptomlarının daha qısa vaxtda özünü büruzə verməsi COVID-19-la mübarizədə vaksinasiyasının əhəmiyyətini bir daha vurğulayır.