Rafiq Hüseynov: “Düşmənin tör-töküntülərinin başlarını əzmək üçün hazır olmalıyıq” - MÜSAHİBƏ + FOTO

“Müharibədə qalib gəlməyimizə baxmayaraq, düşmənin tör-töküntüləri hələ də baş qaldırırlar, revanşist xarakterli çıxışlar edirlər. Daim belələrinin başını əzmək üçün hazır olmalıyıq”.

Bunu Oxu.Az-a müsahibəsində Azərbaycanın yunan-Roma güləşçisi, dünya çempionu, üçqat Avropa çempionu, Tokio Olimpiadasının bürünc medalçısı Rafiq Hüseynov deyib. Həm də Azərbaycan Ordusunun zabiti olan 35 yaşlı idmançı hərbi fəaliyyəti ilə bağlı sualları cavablandırıb.

Müsahibəni təqdim edirik:

- Azərbaycan Ordusunun zabiti kimi Silahlı Qüvvələr Gününüzü təbrik edirik!

- Təşəkkür edirəm! Bilirsiniz ki, 1918-ci ilin 26 iyununda Səməd bəy Mehmandarov və Əlimərdan bəy Topçubaşov Milli Ordunun əsasını qoydular. Lakin Azərbaycan Xalq Cümhuriyyətinin süqutundan sonra ordu dağıdıldı və mötəbər generallar Nargin adasında güllələndilər. Bunlar heç kimə sirr deyil və xatırlamağa borcluyuq. O insanlar həmin vaxt üçün böyük işlər görüblər. Sonralar uzun illər ərzində bu gün unuduldu. 1991-ci ildə ovaxtkı prezidentin sərəncamı ilə bu gün oktyabra keçirildi. 1998-ci ildə isə ulu öndər Heydər Əliyevin sərəncamı ilə 26 iyun Silahlı Qüvvələr Günü kimi qeyd olunmağa başlandı.

Biz 2018-ci ildə ordumuzun 100 illiyini qeyd etdik. Şərəfli hissdir ki, bu günü yaşaya bildik. Mən başda Ali Baş Komandan, Prezident İlham Əliyev olmaqla müdafiə naziri, general-polkovnik Zakir Həsənovu və Baş Qərargah rəisi general-polkovnik Kərəm Vəliyevi, bütün Azərbaycan Ordusunu təbrik edirəm. Şərəf hissi duyuram ki, mən də bu ordunun üzvüyəm. Bu gün gənclərin hər biri ordumuzun üzvü olmaqdan şərəf duymalıdır. Bütün ordumuzu və xalqımızı təbrik edirəm.

- Sizi idmançı kimi tanıyırıq. Bəs hərbçi Rafiq Hüseynov kimdir?

- Əvvəlcə onu deyim ki, təsadüfən hərbçi olmamışam. Polis ailəsində böyümüşəm və uşaqlıqdan sistem işinə marağım olub. Müəyyən səbəblərə görə polisdə işləyə bilməmişəm. 2015-ci ildə Hərbçilərin Dünya Oyunlarının qalibi olduqdan sonra müdafiə naziri Zakir Həsənovun göstərişi ilə təlim-tədris mərkəzinə tədris almağa göndərildim. Ondan sonra leytenant rütbəsinə yiyələndim. Hazırda Mərkəzi Ordu İdman Klubunun zabiti, eyni zamanda, tağım komandiriyəm. Azərbaycan Ordusunun zabiti olmaq şərəfverici hissdir.

- Keçən il kapitan rütbəsi almısınız.

- Bəli. Avropa çempionatından sonra cənab nazirin göstərişi ilə kapitan rütbəsi almışam. Komandamız da Avropa çempionatının qalibi olmuşdu. Yüksək nailiyyətə görə vaxtından əvvəl mənə bu rütbə verildi.

- İdmanla hərbi işi necə uyğunlaşdırırsınız?

- Bəziləri düşünürlər ki, idmanla hərb işi bir-birinə uyğun gəlmir və çətindir. Əlbəttə, normalda çox çətin prosesdir. Ancaq nəzərə alaq ki, ordu rəhbərliyi idmanımıza daim dayaq olur və məşqlərdə iştirak etməyimizə şərait yaradır. Mənə kifayət qədər imkan yaradılır ki, məşqlərimdən geri qalmayım. Bacardığımız qədər iş prosesində oluruq. Lakin bəlli məsələdir ki, təlim-məşq toplanışlarında olanda, eyni zamanda, yarışlar vaxtı işdən kənarda qalırıq. Bunlar nəzərə alınır və daim bizə dəstək olurlar.

- Hər iki sahə də nizam-intizam tələb edir.

- Mən nizam-intizamı evdə atamdan görmüşəm. Özüm də müəyyən yaşdan sonra buna üstünlük vermişəm. Düşünürəm ki, hərbçi və ya idmançı olub-olmamağından asılı olmayaraq, həyatda bacardığın qədər nizam-intizamlı olmalısan. Hər uğurun arxasında bu dayanır, başqa cür mümkün deyil. Hərbiyə gələndən sonra isə nizam-intizamın nə olduğunu bir daha başa düşdüm. Özüm üçün yeni qaydalar götürdüm. Bu, mənim üçün böyük uğur oldu. Hərbi sahədən öyrənəcəyim çox şey var.

- Qeyd etdiniz ki, bu sahəyə təsadüfən gəlməmisiniz. Deyə bilərikmi ki, güləşçi olmasaydınız, məhz hərbçi olardınız?

- Çox çətin sualdır. Məsələ ondadır ki, güləşçi olduğuma görə hərbçiyəm. Yüksək nəticələrə görə hərbi işə dəvət olunmuşam. Buna baxmayaraq, polis ailəsində böyüdüyüm üçün daha çox polis olmağı seçərdim. Atam polis polkovniki, əmim polis generalı, qardaşım da polis serjantıdır. Düşünürəm ki, polis ola bilərdim.

- Bəs hərb sahəsinə nə dərəcədə marağınız var idi?

- Daha çox siyasətə marağım var. Hərb və siyasət tam fərqli strukturlardır. Amma buna baxmayaraq, hər bir kişi kimi silahlarla maraqlanıram. Ən azından, bizim Ordumuzda olan silahlar barədə məlumatımız olmalıdır. Müharibədə qalib gəlməyimizə baxmayaraq, düşmənin tör-töküntüləri hələ də baş qaldırırlar, revanşist xarakterli çıxışlar edirlər. Daim belələrinin başlarını əzmək üçün hazır olmalıyıq. Yaxşı olar ki, silahlardan da başımız çıxsın, eyni zamanda, hərbi işlərdən də.

- Siyasətə marağınız varsa, idmançı karyeranızdan sonra bu sahəyə atılacağınızı gözləmək olar?

- Planımda var. Siyasət sevdiyim mövzudur. Tək Azərbaycanda deyil, dünyada baş verən hadisələr məni maraqlandırır. Komanda yoldaşlarımın hamısı bilirlər ki, heç bir günümü xəbərlərsiz açmıram. Daim Avropadan bir, Rusiyadan isə digər telekanal açıq olur. Hər ikisi bir-birinə zidd xəbərlər paylaşır. Obyektiv mövqeyi tutmaq üçün hər ikisi mənə maraqlıdır.

- Bildiyimə görə, erməni dilində danışmağı bacarırsınız. Bunu necə öyrənmisiniz və bilməyin sizin üçün nə əhəmiyyəti var?

- Valideynlərim əzəli torpaqlarımız İrəvanda böyüyüb təhsil aldıqlarına görə onlar dili mükəmməl bilirlər. Yadıma gəlir ki, uşaq vaxtı bizdən nəsə sirr saxlamaq istəyəndə o dildə danışardılar ki, biz başa düşməyək. Uşaqlıqdan eşitdiyimə görə dilə yiyələnmişəm. Sonralar bir müddət praktika keçdim, kino və xəbərləri izləyirdim. Ancaq son zamanlar praktika olmadığına görə geriləmə hiss edirəm. Gələcəkdə lazım olarsa, mükəmməl şəkildə təkmilləşdirə bilərəm.

- Düşmənin dilini bilmək ümumən müsbət məqam sayılır. Bəs nə vaxtsa bu, sizin işinizə yarayıb?

- Məncə, hər bir dili bilmək kifayət qədər işə yarayır. Mən Gürcüstanda erməni güləşçi ilə qarşılaşanda bu, köməyimə çatıb. Məşqçisi onu əks fəndə sövq edirdi. Mən onun dediklərini başa düşdüyüm üçün özüm rəqibimi əks fəndə saldım və böyük xal üstünlüyü ilə qalib gəldim. Amma o demək deyil ki, təkcə dili bilməklə uğur əldə edə bilərsən. Uğur üçün çox amillər var. Sadəcə, bu da xeyirli olub.

- Beynəlxalq yarışlarda tez-tez ermənilərlə qarşılaşırsınız. Bir hərbçi kimi onlarla görüşlərə xüsusi yanaşırsınız?

- Mən bu mövzuda fərqli fikirdəyəm. İdmanı millətlərə bölməyin tərəfdarı deyiləm. Burada daim qələbə yoxdur. Bəzən məğlub da ola bilərsən. Ehtiyat edib, həmişə deyirəm ki, mənim üçün rəqibin fərqi yoxdur. Yarışlara hər hansı millətin üzvünə qalib gəlməyə yox, çempion olmağa, medal qazanmağa gedirəm. Əgər erməniyə qalib gələndə qəhrəmansansa, məğlub olanda da xalq düşməni olmalısan. Bu prinsiplə yanaşıram. Çalışıram ki, mövzudan yan qaçım. Buna baxmayaraq, bəzən azarkeşlərlə bir dalğada olmağa çalışırsan. Xüsusən, düşmən ölkə üzvləri ilə qarşılaşmalarda insanlar bizdən qələbə gözləyirlər. Arada elə olur ki, bir dalğaya düşürük. Eyni zamanda başqa bir fəlsəfə ilə də yanaşıram. Bu gün düşmən ölkənin idmançısını xüsusiləşdirib dağ başına qoymağa ehtiyac yoxdur. Kasıb, aciz ölkənin üzvləridirlər. Biz isə kifayət qədər inkişaf etmiş, gücə sahib olan Azərbaycanı təmsil edirik. Özümü onlarla müqayisə etmək istəmirəm. Ermənilərə yarışda qalib gəlməyi xüsusi qəhrəmanlıq saymıram. Daha yaxşı olar ki, daha inkişaf etmiş ölkələrin idmançılarını məğlub edəndə sevinək və qəhrəman hesab olunaq, nəinki hansısa aciz ölkənin üzvünə qalib gələndə. Fikirləşirəm ki, bu düşüncə ucuz piardır.

- 44 günlük Vətən müharibəsində ordumuz erməniləri darmadağın etdi və torpaqlarımızı geri qaytardı. Bir hərbçi kimi müharibə barədə fikirləriniz maraqlıdır...

- Dünya praktikasında belə bir şey olmayıb ki, 44 gün ərzində bir ölkənin ordusu digər ölkənin ordusunu darmadağın etsin və elə bir vəziyyətə salsın ki, 10 mindən çox hərbçisi blokada şəraitində qalsın və yalvarsınlar, xahiş etsinlər ki, bizi bağışlayın, hərbçilərimizi buraxın. Digər tərəfdən, Ordumuz dünya praktikasında olmayan döyüş üslubu nümayiş etdirdi. Pilotsuz uçuş aparatları - “Harop” və “Bayraktar”lardan mükəmməl şəkildə istifadə olundu. Prezident İlham Əliyev də bu barədə fikirlərini bildirərək deyib ki, bu müharibə hərb kitablarına nümunə kimi yazılan savaş oldu.

- Bildiyimə görə, siz müharibənin iştirakçısı olmamısınız.

- Müharibə vaxtı biz də həyəcanlı idik. Bəli, təəssüf ki, mən iştirak edə bilmədim. Çünki Mərkəzi Ordu İdman Klubu döyüşlərə cəlb olunmadı. Bir növ buna görə sevinirəm. Çünki bu o deməkdir ki, ehtiyac olmayıb. Ordumuz çox yaxşı vəziyyətdə idi.

- Artıq yarışlarda Azərbaycanı qalib ölkənin idmançıları kimi təmsil edirsiniz. Hansı fərqləri hiss edirsiniz?

- Düşünürəm ki, həyəcanlarımız, kədərimiz, sevincimiz sonda elə bir vəziyyətə çıxardı ki, başıuca gəzirik. Biz idmançılar Ordumuza borcluyuq. Bir zamanlar düşmən ölkənin üzvlərini görəndə bir növ məyus, başıaşağı şəkildə yanlarından keçirdik. İndi başıuca keçirik, yeri gəlsə, sözümüzü də deyirik. Pandemiya vaxtı dünya çempionatında Eldəniz Əzizli mükafatlandırmaya “Qarabağ Azərbaycandır!” maskası ilə çıxdı və yenidən bütün dünyaya elan etdi ki, ora bizim torpağımızdır. Biz də eyni zamanda bunu deyirik. Beynəlxalq mediaya müsahibə verəndə danışır, qalib ölkənin üzvləri olduğumuzu deyir və bununla fəxr edirik.

- Bir az öncə qeyd etdiyiniz kimi, ermənilərin revanşist meyilləri səngimir, davamlı təxribatlar törədirlər. Bu halda biz ordu sahəsində necə davranmalıyıq?

- Azərbaycanda ordu quruculuğu tam təkmilləşib. Prezidentin sərəncamı ilə komando birlikləri yaradılıb. Eyni zamanda, xüsusi təyinatlılarımız mütəmadi olaraq təlimlərdə iştirak edirlər. Ordumuza hərbi biliklərə, elmə yiyələnmiş şəxslər cəlb olunurlar və təkmilləşdirilir. Bunlar onu göstərir ki, biz boşalmamışıq, hər an hazırıq. 2023-cü ilin dövlət büdcəsindən beş milyard manata yaxın hərbi sahəyə ayrılıb. Nəzərə alsaq ki, Ermənistanın ümumi dövlət büdcəsi beş milyarddır, rəqəmlər göstərir ki, müharibədən sonra da bu işə ciddi yanaşırıq. Bəli, qarşı tərəfdə revanşist çıxışlar var. Bir növ bunlara sevinirəm ki, bu viruslar ortaya çıxırlar və onları məhv etmək lazımdır. Əlbəttə, düşünürəm ki, bu müharibə yüzillərlə davam edə bilməz, nə vaxtsa bitməli, sülh müqaviləsi imzalanmalıdır. Bu viruslar vaxtında təmizlənsə, sülh müqaviləsindən sonra hər hansı maneə qalmayacaq. Cənab prezidentin siyasəti bununla bağlıdır. İnanıram ki, qarşıda olan planlarımız realizə olunacaq. Sadəcə, səbir etmək lazımdır. Bunun üçün mükəmməl siyasət lazımdır və bu da bizdə var. Şübhəm yoxdur ki, hər şey yolunda gedir.

Daha çox foto burada: PhotoStock.az

Faiq Tahirov