Bakı Metropolitenində “Əlçatan metro” layihəsi çərçivəsində əlil arabası istifadəçilərinin rahatlığına xidmət edəcək daha iki yeni tipli qurğu istifadəyə verilib.
Oxu.Az xəbər verir ki, bu barədə “Bakı Metropoliteni” QSC-dən məlumat verilib.
Məlumatda qeyd edilib ki, TEMI qurğusu əlil arabalarının eskalatorlarda istifadəsi üçün nəzərdə tutulub:
“Sankt-Peterburq metrosunda istismar olunan bu qurğu modernləşdirilərək yenidən hazırlanıb. Sənaye təhlükəsizliyi ekspertizasının müvafiq rəyindən sonra metro eskalatorlarında istifadə üçün təhlükəsiz və uyğun hesab edilib.
Qurğu Rusiya Nəqliyyat Nazirliyi tərəfindən dövlət satınalmaları üçün rəsmi tövsiyə olunur və innovativ texnologiyaların siyahısına daxil edilib. Avadanlığın istehsalında hidravlik və elektromexaniki sistemlərdən istifadə olunmayıb. Bu texniki vasitənin Bakı metropolitenində aparılan sınaqlar əsasında ən nəzərəçarpan keyfiyyətləri sırasında təhlükəsizlik və etibarlılığı qeyd oluna bilər.
Avadanlığın öz çəkisi 45 kq-dır. Lakin sərnişinlə birlikdə çəkisi 115 kq-dək olan əlil arabaları və digər daşıma qurğularının istifadəsi üçün nəzərdə tutulub. Qurğunun müxtəlif növ əlil arabaları üçün tənzimlənən pandusları, xüsusi bərkitmə elementləri, əlavə təhlükəsizlik platforma avtoblokatoru, təhlükəsizlik kəməri, işıq xəbərdaredici siqnal göstəricisi, habelə, cihazı qaranlıqda nəzərəçarpacaq edən lüminessent örtüyü var”.
Bildirilib ki, yeni texniki qurğunun texniki sınaqları uğurla aparılıb. Yeni qurğuların daşıma imkanları və funksionallığı müsbət dəyərləndirildiyindən gələcəkdə eskalatorlu stansiyalarda daha geniş tətbiqi nəzərdə tutulub:
“Ümumiyyətlə, “Bakı Metropoliteni” QSC-nin “Əlçatan metro” layihəsi təkcə əlil arabası istifadəçilərini deyil, fiziki imkanları metrodan istifadəni məhdudlaşdıran bütün kateqoriyalardan olan sərnişinləri də nəzərdə tutur. Bunlar:
- əsa və qoltuqaltı ağac ilə hərəkət edənlər;
- görmə və eşitmə qabiliyyəti məhdud olanlar;
- uşaq arabaları ilə hərəkət edənlər;
- ahıllar;
- əl yükü olan hamilə qadınlardır.
Metropoliten hüdudlarında əlil arabası olmayanlar üçün də bu qurğular təklif olunur.
Sifariş müddəti 1-24 saatdır.
Sifariş zamanı mobil əlaqə və SMS üçün (+994 50) 268-00-65 nömrəsinə müraciət edə bilərsiniz”.
Qeyd edək ki, hazırda Bakı metropolitenində məhdud hərəkət imkanı olan sərnişinlərin pilləkən və eskalatorlarda endirilib-qaldırılması üçün bir ədəd T09 “Robe” və beş ədəd “Dragon” qurğusundan istifadə olunur.
Daha çox foto burada: PhotoStock.az
Könül Cəfərli
