Truth Social – nədir və platformanın yaradılmasının arxasında kim dayanır

Truth Social (TRUTH Social) – ABŞ prezidenti Donald Trampın təşəbbüsü ilə yaradılmış sosial şəbəkədir. Bu qərar Trampın rəsmi səhifələri Twitter, Facebook və YouTube-da bloklandıqdan sonra qəbul edilib. 

Trampın sosial şəbəkəsi Trump Media & Technology Group (TMTG) şirkəti tərəfindən hazırlanıb. T Media Tech LLC kimi də tanınan bu Amerika mühafizəkar media və texnologiya şirkəti 2021-ci ilin fevralında Donald Tramp tərəfindən təsis edilib. Platforma azad və açıq mənbəli "Mastodon" proqram təminatına əsaslanır.

Trampın trolling edilməsi və saxta hesablar problemi

Truth Social yaradılarkən onun populyarlıqda artıq tanınmış sosial şəbəkələri geridə qoyması planlaşdırılırdı, lakin şirkət bir sıra problemlərlə üzləşdi. Platformanın 2022-ci ilin birinci rübündə fəaliyyətə başlayacağı elan edildikdən bir neçə saat sonra şəbəkədə Truth Social-da qeydiyyatdan keçməyə imkan verən link peyda oldu. 

Bu imkan istifadəçilərə saxta hesablar yaratmaq üçün "yaşıl işıq" yandırdı. Bu üstünlükdən istifadə edən istifadəçilər satirik məzmunlar yaratdılar ki, bu da Trampdan yan keçmədi. Truth Social platformasında Donald Trampın adına, üzərində təbii ehtiyacını ödəyən donuz şəkli olan saxta hesab yaradıldı. Bu hadisələrdən sonra platformaya giriş bağlandı.

İstifadəçilər üçün məhdudiyyət və İlon Maskın Truth Social-ı necə populyarlaşdırması

Yükləmə sayına görə proqram App Store-da birinci yeri tutdu. Lakin platforma bu qədər istifadəçi axınına dözməyərək texniki cəhətdən sıradan çıxdı. Qeydiyyat bərpa edildikdən sonra yaradılan hesabların sayını məhdudlaşdırmaq qərara alındı. 

Truth Social-da hesab açmaq istəyənlərin çox olmasına baxmayaraq, istifadəçilər qeydiyyat zamanı bir sıra problemlərlə qarşılaşdılar və bu da platformanın populyarlığını 84-cü yerə qədər saldı. 

Ekspertlərin platformaya marağın azalacağı ilə bağlı proqnozlarına rəğmən, İlon Maskın Twitter-i rəsmən almasından sonra Truth Social yenidən App Store yükləmələrində birinci yeri tutdu. Buna təkan verən isə Maskın Truth Social haqqındakı fikirləri oldu; o, Trampın sosial şəbəkəsinin adını "Trumpet" olaraq dəyişdirməyi təklif etmişdi. 

Qeyd edək ki, Truth Social xidməti yalnız ABŞ və Kanada sakinləri üçün əlçatandır.