Cümə axşamı ABŞ-də federal hakim Donald Trampı geri çəkilməyə məcbur edən qərar çıxarıb. Prezidentə CNN, MS NOW və "Politico"nun əməkdaşlarının Ağ Evə girişini bərpa etmək göstərişi verilib. Hakim bildirib ki, qoyulan qadağa böyük ehtimalla konstitusiyaya ziddir.
Oxu.Az xəbər verir ki, bu barədə "Reuters" agentliyi məlumat yayıb.
Hadisələr Trampın "Truth Social" şəbəkəsindəki paylaşımından sonra başlayıb. O, həmin platformada üç redaksiyanın işçilərinin artıq Ağ Evdə işləmək hüququnun olmadığını elan edib. Eyni mesajda o, həmin media qurumlarını hədəf alıb. CNN-i "yalançı" adlandırıb, MS NOW barədə "izləyici və etimad çatışmazlığı səbəbindən" əvvəlki (MSNBC) adını dəyişdiyini kinayə ilə qeyd edib. "Politico" haqqında isə yazıb ki, Co Bayden administrasiyası bu nəşrə 8 milyon dollarlıq "qeyri-qanuni və gülünc bir abunəlik" rəsmiləşdirib.
Trampın iddiasına görə, vəsait qəzeti ayaqda saxlamaq üçün birbaşa ABŞ büdcəsindən ayrılıb. O, bunu korrupsiya adlandırıb. İndi isə məhkəmə prezidentin yalnız bir paylaşımla jurnalistləri Ağ Evdən qovmaq hüququnu faktiki olaraq şübhə altına alıb.
