ABŞ Prezidenti Donald Tramp "Truth Social" platformasında pələng və şirlərin insanlara hücum etdiyi kadrları, eləcə də neyroşəbəkə vasitəsilə yaradılmış, özünün pələnglə güləşdiyi və qucaqlaşdığı videonu paylaşıb.
Oxu.Az xəbər verir ki, dövlət başçısı ilk olaraq Böyük Britaniyadakı zooparkların birində pələngin ziyarətçiyə ölümcül hücumunu əks etdirən kadrları yayımlayıb. Tramp həmin paylaşımına "Təbiətlə zarafat etmək olmaz!" şərhini əlavə edib.
Daha sonra ABŞ lideri şirlərin zoopark baxıcılarına və ziyarətçilərə etdiyi bir neçə hücumun görüntüsünü yerləşdirib.
Ardınca ABŞ Prezidenti süni intellektlə hazırlanmış 23 saniyəlik video yayımlayıb. Kadrlar Trampın ot üzərində uzanaraq pələngə barmaqla hədə-qorxu gəlməsi ilə başlayır. Yırtıcı heyvan neyroşəbəkə tərəfindən yaradılmış prezidentə pəncəsi ilə toxunaraq qaçdıqda, o, heyvanın arxasınca düşərək onu yerə yıxır. Videonun sonunda isə prezidentlə pələng qucaqlaşır.
