İngiltərə klubunun azərbaycanlı məşqçisi: "Üçüncü kuboku da qazanmaq istəyirik"

"Pley-offda qələbə qazanaraq üçüncü titulu əldə etmək istəyirik".

Oxu.Az xəbər verir ki, bunu "Report"a açıqlamasında İngiltərənin "Ridinq Rokets" basketbol komandası ilə "Kitkinq Trofi" kubokunun qalibi olan azərbaycanlı baş məşqçi Samit Nuruzadə deyib.

Mütəxəssis "Milton Keyns Dons"u (97:75) məğlub etdikləri final matçı ilə bağlı fikirlərini bölüşüb:

"Bu, çox sevindirici bir haldır. Çox güclü rəqibə qarşı oynayırdıq. Yanvarda İngiltərə Milli Kubokunu əldə etmişdik. Bu isə "Kitkinq Trofi"dir. Burada ancaq I Diviziondakı kollektivlər iştirak edirlər. Çox nüfuzlu yarışdır. Qalib gəldiyimiz üçün çox sevinirəm. Milli Kuboka isə dörd divizionun klubları qatıla bilirdilər".

S.Nuruzadə İngiltərədə komandaların dörd titul uğrunda mübarizə apardıqlarını söyləyib:

"Milli Kubok və "Kitkinq Trofi"də qalib olduq. Liqada birinci olmaq, yəqin ki, mümkün deyil. Ardınca pley-offun çempionu müəyyənləşəcək. "Hemel Storm"un üç, bizim isə beş məğlubiyyətimiz var. Bir az çətin görünür, çünki sona üç tur qalıb. Rəqib də çox güclüdür. İkinci yerin sahibi kimi pley-offda uğurlu çıxış etmək niyyətindəyik. Hər məşqçinin istəyi qalibiyyət əldə etməkdir. Ümid edirəm ki, 1/4 final və yarımfinalda yaxşı nəticələr göstərərək finala vəsiqə qazanacağıq. Ötən il bunu edə bildik. Dördüncü yerdə olsaq da, finaladək irəliləyə bildik. Pley-offun qalibi olaraq üçüncü titulu əldə etmək niyyətindəyik".