İyunun 24-ü Vaşinqtonda, ABŞ Konqresinin binasında "Qayıdış hüququ və öz müqəddəratını təyinetmə: ikili standartlar və selektiv yanaşmalar" mövzusunda beynəlxalq Konfrans keçirilib.
Oxu.Az Baku TV-yə istinadən xəbər verir ki, Bakı Təşəbbüs Qrupunun icraçı direktoru Abbas Abbasov konfrans barəsində danışarkən ayrılan konfrans zalının adı barədə simvolik məqamdan bəhs edib.
O bildirib ki, konfrans zalının adının Nensi Pelosi olması simvolik məqamdır:
"Həmin şəxs uzun müddət ABŞ Nümayəndələr Palatasının spikeri olmuş, ermənipərəst və Azərbaycana qarşı ədalətsiz mövqeyi ilə fərqlənən biridir. Belə bir zalda etnik təmizləmə siyasətinə dair beynəlxalq tədbir keçirmək ermənipərəst təşkilatları və tərəfləri çox qıcıqlandırdı.
Lakin mən düşünürəm ki, bizim bu uğurumuzun təməli Azərbaycanın xarici siyasəti, Prezidentin xarici siyasi kursudur. Biz bir beynəlxalq qeyri-hökumət təşkilatı olaraq bu xarici siyasi kursu özümüzə meyar (bençmark) seçib fəaliyyətimizi buna uyğun tənzimləmək hüququna malikik. Necə ki xarici siyasətimizin uğurları bütün beynəlxalq ictimaiyyətin gözü önündədir, Bakı Təşəbbüs Qrupu da son 3 ildə bu qəbildən olan uğurlara imza atıb".
Abbas Abbasov əlavə edib ki, konfransın sonunda Konqresə rəsmi müraciət ünvanlanıb:
"Biz beynəlxalq hüququn norma və prinsiplərinə sığınaraq 20-ci əsr boyu etnik təmizləməyə məruz qalmış Qərbi azərbaycanlıların öz dədə-baba torpaqlarına təhlükəsiz şəkildə qayıdışının təmin olunmasını tələb etdik. Biz bu rəsmi müraciəti həm fiziki olaraq Konqresə təqdim etdik, həm də bütün konqresmenlərin elektron poçt ünvanlarına göndərdik. Prosedur qaydalarına tam əməl edərək bu prosesi tamamladıq".
