Antidepresant qəbul edən insanın nə qədər kökələcəyi öyrənilib

Antidepressantlarla müalicə alan insanlarda çəki orta hesabla 2% artır.

Oxu.Az-ın verdiyi məlumata görə, bu barədə İspaniyanın "Del Mar" Xəstəxanasının Tibbi Tədqiqat İnstitutunun (IMIM) alimləri bəyan ediblər. Onların tədqiqatlarının nəticələri "Frontiers in Psychiatry" jurnalında dərc olunub.

Tədqiqatda 18-65 yaş arası 3 127 yetkin insan iştirak edib. Onlardan 5.1 faizi tədqiqatın bütün dövrü ərzində antidepressant qəbul edib, 6.2 faizi tədqiqata daxil edildikdən sonra müəyyən bir məqamda qəbul etməyə başlayıb, 5.1 faizi isə tədqiqatın əvvəlində qəbul edib, lakin sonradan dayandırıb.

Altıillik müşahidə dövründə bütün iştirakçılar artıq çəki qazanıblar. Ən çox çəki artımı antidepressant qəbul edənlərdə müşahidə olunub.

"Antidepressant qəbul edən bütün insanlarda çəki artımı və piylənmə riski yüksəlir," - deyə alimlər bildirib.

Hesablamalara görə, müşahidənin əvvəlində antidepressant qəbul edib sonradan dayandıran iştirakçıların çəkisi, heç vaxt antidepressant qəbul etməyənlərlə müqayisədə 1,8% artıb.

Tədqiqat zamanı antidepressant qəbuluna başlayanlar və bütün tədqiqat boyu qəbul etməyə davam edənlər isə 2% daha çox çəki qazanıb. Üstəlik, sonuncu qrupda piylənmə riski iki dəfə artıb.

Tədqiqatçılar qeyd ediblər ki, antidepressant qəbulu ilə çəki artımı arasındakı əlaqə yaş, cins, sosial-iqtisadi vəziyyət, həyat tərzi və depressiya əlamətlərinin intensivliyindən asılı olmayaraq sabit qalıb.