Aygün Əliyeva: "Azərbaycan ilk dəfə COP29 kimi möhtəşəm tədbirə ev sahibliyi etdi"

"Müstəqilliyin ilk illərində qeyri-hökumət təşkilatları ilə dövlət qurumlarının birgə fəaliyyətində ciddi problemlər var idi".

Oxu.Az xəbər verir ki, bunu Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin icraçı direktoru Aygün Əliyeva Nizami Rayon İcra Hakimiyyəti və Yeni Azərbaycan Partiyası Nizami rayon təşkilatının birgə təşkilatçılığı ilə keçirilən "Qalib lider faktoru: Ölkəmizin dünyada artan nüfuzu və yeni reallıqlar" mövzusunda konfransda deyib.

O bildirib ki, bunu nəzərə alan ümummilli lider Heydər Əliyev problemi aradan qaldırmaq üçün vacib addımlar atdı:

"Hazırda ulu öndərin miras qoyduğu ənənələr sayəsində Azərbaycan vətəndaş cəmiyyəti ilə dövlət arasında münasibətlər ən yüksək səviyyədədir. Şuşa-Xankəndi yolundakı dinc etiraz aksiyası bu münasibətlərin vəhdətinin kulminasiya nöqtəsi idi. Ölkəmizdə bərqərar olan iqtisadi, siyasi, sosial, mədəni inkişaf, vətəndaş cəmiyyəti və siyasi plüralizm uzunmüddətli ciddi təşkilati işlərin görülməsinin nəticəsidir. Ölkə Prezidenti öz şəxsi nümunəsi ilə hər kəsin müstəqil mövqeyini, fərqli düşünmək hüququnu qəbul edir, hətta opponentlərin əsassız tənqidlərinə hədsiz dözümlülük göstərir. Siyasi pozuntulara cəhd edən qüvvələrə qarşı isə ciddi mübarizə aparır"

"Bu il Azərbaycan ilk dəfə COP29 kimi möhtəşəm tədbirə ev sahibliyi etdi. Bu sammitdə iştirak baxımından qeyri-hökumət təşkilatları dövlətlərdən sonra ən çox təmsilçiliyə malik idi. Tədbir zamanı ölkəmizə 10 minə yaxın qeyri-hökumət təşkilatının nümayəndələri gəlmişdilər. Amma təəssüf ki, bu cür əhəmiyyətli tədbir zamanı da bəzi qüvvələr qarayaxma kampaniyalarını davam etdirdilər. Təbii ki, bu zaman səsləndirilən ən böyük ittiham Azərbaycanın neft ölkəsi olması ilə bağlı idi. Azərbaycan tarixən neftin sənaye üsulu ilə istehsal olunduğu ilk ölkədir. Hətta bu gün həmin o siyasi dairələrin də fəxrlə adını çəkdiyi Nobel mükafatının nüfuzu da, sərvəti də Azərbaycan neftindən qidalanıb. Azərbaycanı neft ölkəsi olmaqla ittiham edən qüvvələr həm də onu göz önünə gətirməlidirlər ki, bu gün Azərbaycan enerji ölkəsi olmağa doğru çox uğurla inteqrasiya edir, 30 il ərzində işğal altında olan torpaqlarımızı sıfır emissiya ilə gülüstana çevirir".

Mərahim Nəsib