Azərbaycanın 2024-cü ildə vəfat edən məşhurları

2024-cü il həyatımıza bir çox xoş yeniliklər, önəmli hadisələr, əlamətdar tədbirlərlə daxil olsa da, həmçinin, önəmli simaların itkisi ilə də yadda qaldı.

Oxu.Az-ın əməkdaşı 2024-cü ildə Azərbaycanın vəfat edən tanınmış insanlarının siyahısını hazırlayıb:

Azərbaycan Respublikasının Əməkdar artisti, qarmon ustası Gülbahar Şükürlü yanvarın 5-də onkoloji xəstəlik səbəbindən həyatını itirib.

O, 2009-cu ildə "Əməkdar artist" fəxri adına layiq görülmüşdü.

Azərbaycan Respublikasının Əməkdar artisti, tanınmış ifaçı Aygün Bəylər də yanvarın 6-da onkoloji xəstəlik səbəbindən vəfat edib.

O, 2002-ci ildə "Əməkdar artist" fəxri adına layiq görülmüşdü.

Azərbaycan Yazıçılar Birliyinin üzvü, filologiya elmləri doktoru (1979), professor Çingiz Hüseynov yanvarın 9-da vəfat edib.

1929-cu il aprelin 20-də Bakıda anadan olan yazıçı həm də tənqidçi, ədəbiyyatşünas və tərcüməçi olub. O, əsərlərini iki dildə - Azərbaycan və rus dillərində yazıb.

Ç.Hüseynov İsraildə yaşayırdı.

Əməkdar elm xadimi, tibb elmləri doktoru, professor, "Şöhrət" ordenli həkim Solmaz İsrafilbəyli yanvarın 11-də vəfat edib.

Solmaz İsrafilbəyli Həkimləri Təkmilləşdirmə İnstitutunun Mama-Ginekologiya kafedrasının müdiri, 1982-89-cu illərdə Azərbaycanın baş mama ginekoloqu, Respublika Mama-Ginekoloqlar Cəmiyyətinin sədri vəzifələrində çalışıb. S.İsrafilbəyli indiyə qədər çapdan çıxmış 180-ə yaxın elmi işin, o cümlədən üç monoqrafiyanın müəllifidir.

O, 2000-ci il noyabrın 2-də "Şöhrət" ordeni ilə təltif edilib.

Tanınmış heykəltaraş, Əməkdar incəsənət xadimi, Dövlət mükafatı laureatı, Prezident təqaüdçüsü Telman Zeynalov yanvarın 12-də vəfat edib.

Sənətkarın II Dünya müharibəsində həlak olan hərbçilərin xatirəsinə hazırladığı və Lənkəranda ucaldılan monument (1978) respublikanın Dövlət mükafatına layiq görülüb.

Heykəltaraş 2002-ci ildən Azərbaycan Respublikası Prezidentinin fərdi təqaüdçüsü idi.

Uzun illər Qobustan Milli Tarix-Bədii Qoruğunun əməkdaşı olmuş tanınmış arxeoloq, tarix üzrə fəlsəfə doktoru, Qobustan abidələrinin tədqiqatçısı Firuzə Muradova yanvarın 16-da vəfat edib.

Uzun illər AMEA-nın Arxeologiya, Etnoqrafiya və Antropologiya İnstitutunda və Qobustan Milli Tarix-Bədii Qoruğunda fəaliyyət göstərən, Azərbaycanın ilk xanım arxeoloqlarından olan Firuzə Muradova Qobustan ərazisinin Üst Paleolitdən Orta əsrlər dövrünədək aktual məsələləri araşdırıb. Müəllifi olduğu 100-dən çox elmi əsər, o cümlədən "Qobustan Tunc dövründə", "Qobustan petroqlifləri", "Kiçikdaş abidələri" kitabları elmi ictimaiyyət tərəfindən maraqla qarşılanıb.

Lənkəran Dövlət Dram Teatrının aktyoru, Əməkdar artist Niftulla Əsgərov yanvarın 22-də vəfat edib.

Niftulla Əsgərov uzun sürən xəstəlikdən sonra dünyasını dəyişib.

O, 2018-ci ildə "Azərbaycan Respublikasının Əməkdar artisti" fəxri adına layiq görülmüşdü.

Ədəbiyyat tariximizin görkəmli tədqiqatçısı, mətnşünas, Azərbaycan Yazıçılar Birliyinin üzvü, AMEA-nın M.Füzuli adına Əlyazmalar İnstitutunun direktor müavini, filologiya elmləri doktoru, professor Paşa Kərimov yanvarın 25-də vəfat edib.

Dövlət başçısının müvafiq sərəncamı ilə 2015-ci ildə "Tərəqqi" medalı ilə təltif olunmuşdu. O, eyni zamanda, bir sıra beynəlxalq mükafatlara layiq görülmüşdü.

P.Kərimov Əlyazmalar İnstitutu nəzdindəki "Dinşünaslıq" üzrə birdəfəlik ixtisaslaşdırılmış Dissertasiya şurasının sədri, UNESCO-nun "Dünya yaddaşı proqramı" üzrə Azərbaycan milli komitəsinin sədr müavini idi.

Tanınmış jurnalist Rəhman Orxan fevralın 2-də uzunsürən xəstəlikdən vəfat edib.

Dövlət başçısının müvafiq sərəncamı ilə o, 2016-cı ildə "Əməkdar jurnalist" fəxri adına layiq görülmüşdü.

Tanınmış baletmeyster, Xalq artisti Rəfiqə Axundova fevralın 16-da vəfat edib.

Azərbaycan balet sənətinin və milli xoreoqrafiyanın inkişafındakı xidmətləri yüksək qiymətləndirilən Rəfiqə Axundova 1958-ci ildə "Əməkdar artist", 1970-ci ildə "Xalq artisti" fəxri adlarına, eləcə də "Şərəf nişanı" ordeni (1959) və müstəqil Azərbaycanın "Şöhrət" ordeninə (2021) layiq görülmüşdü. 2002-ci ildən Azərbaycan Respublikası Prezidentinin fərdi təqaüdçüsü idi.

Bədəlbəylilər soyunun tanınmış nümayəndələrindən olan alim, kimya elmləri doktoru, professor, Əməkdar müəllim Telman Ağdamski fevralın 19-da vəfat edib.

O, 1992-ci ildə kimya elmləri doktoru alimlik dərəcəsi alıb. Fiziki kimya ixtisası üzrə professor olub. 2012-ci ildə Prezident İlham Əliyevin sərəncamı ilə "Əməkdar müəllim" fəxri adına layiq görülüb.

Tanınmış müğənni, Azərbaycanın və Tacikistanın Xalq artisti Leyla Şəripova fevralın 19-da Almaniyanın Düsseldorf şəhərində vəfat edib.

L.Şəripovanın repertuarında türk, əfqan, Azərbaycan, türkmən, ərəb, fars, özbək və ispan mahnıları yer alıb.

Xalq yazıçısı Mövlud Süleymanlı fevralın 21-də gözlərini əbədi yumub.

Azərbaycan ədəbiyyatı və mədəniyyətinin inkişafında xidmətləri yüksək qiymətləndirilən yazıçı "Əməkdar incəsənət xadimi" və "Xalq yazıçısı" fəxri adlarına, "Şöhrət" və "Şərəf" ordenlərinə layiq görülüb. 2008-ci ildən Azərbaycan Respublikası Prezidentinin fərdi təqaüdçüsü idi.

Aktrisa Naibə Əlibəyova martın 6-da vəfat edib.

N.Əlibəyova daha çox "Bəyin oğurlanması" filmindəki "Gülbadam" rolu ilə tanınıb.

O, uzun müddət idi ki, onkoloji xəstəlikdən əziyyət çəkirdi.

Tanınmış iqtisadçı alim, Elm və Təhsil Nazirliyinin İqtisadiyyat İnstitutunun Aqrar sektorun iqtisadi problemləri şöbəsinin müdiri, iqtisad elmləri doktoru, professor İsa Hüseyn oğlu Alıyev martın 9-da dünyasını dəyişib.

İ.Alıyev 2011-ci ildə Avropa Biznes Assambleyasının (EBA) Ekspertlər Şurası tərəfindən "İlin ən yaxşı top-meneceri", 2012-ci ildə "Elmdə ad" fəxri adına, 2013-cü ildə isə Beynəlxalq Sokrat Mükafatına layiq görülüb. Alim Avrasiya Beynəlxalq İqtisadçılar İttifaqının yaradıcılarından biri, Avropa Təbiət Elmləri Akademiyasının üzvü idi. 2016-cı ildə Azərbaycan Respublikası Prezidentinin Fərmanı ilə "Tərəqqi" medalı ilə təltif edilib.

Əməkdar artist Sahibə Əhmədova martın 16-da vəfat edib.

Muğam və xalq mahnılarımızın mahir ifaçısı olan Sahibə Əhmədovanın ifasında "Bayatı-Şiraz", "Çahargah", "Şur", "Segah", "Orta Mahur", "Mahur-hindi", "Rahab", "Bayatı-kürd", "Qatar", "Şahnaz" muğam dəstgahları, "Qarabağ şikəstəsi", "Arazbarı", "Simayi-Şəms" kimi zərbi-muğamları lentə alınıb və bir çoxu Azərbaycan Televiziyasının Qızıl Fondunda saxlanılır.

O, 2006-cı ildə "Əməkdar artist"i fəxri adına layiq görülmüşdü.

Sabiq milli təhlükəsizlik naziri, Azərbaycanın Özbəkistandakı keçmiş səfiri Namiq Abbasov martın 27-də vəfat edib.

Tanınmış teatr və kino aktyoru, Əməkdar artist Rahib Əliyev mart 28-də vəfat edib.

Sənətkar 2006-cı ildə "Əməkdar artist" fəxri adına, 2018-ci ildə "Tərəqqi" medalına layiq görülmüşdü. Dəfələrlə Prezident mükafatçısı olub.

Sumqayıt Dövlət Dram Teatrının quruluşçu rejissoru, Əməkdar artist Namis Şirməmmədov aprelin 12-də uzun sürən xəstəlikdən sonra dünyasını dəyişib.

Yaradıcılığı yüksək qiymətləndirilən aktyor 2008-ci ildə Prezident İlham Əliyevin müvafiq sərəncamı ilə "Əməkdar artist" fəxri adına və 2013-cü ildə "Tərəqqi" medalına layiq görülmüşdü.

Sabiq deputat, Milli Məclisin Əmək və sosial siyasət komitəsinin keçmiş sədri Hadı Rəcəbli aprelin 17-də vəfat edib.

O, "Əmək igidliyinə görə" (1976), "Əmək rəşadətinə görə" (1977) medalları, "Şərəf" nişanı (1986), "Şöhrət" (2007), İkinci dərəcəli "Vətənə xidmətə görə" ordenləri (2017) ildə təltif edilmişdi.

Tanınmış müğənni, Əməkdar artist Cavanşir Məmmədov aprelin 20-də vəfat edib.

Cavanşir Məmmədov dövlət başçısının müvafiq sərəncamı ilə 2005-ci ildə "Əməkdar artist" fəxri adına layiq görülmüşdü.

Respublikanın sabiq baş pediatrı, tibb elmləri doktoru, professor Nəsib Quliyev aprelin 24-də intihar edib.

Azərbaycanın ilk İnsan Hüquqları üzrə Müvəkkili (Ombudsman) Elmira Süleymanova aprelin 25-də uzun sürən xəstəlikdən sonra vəfat edib.

O, Azərbaycan Respublikası Prezidentinin fərdi təqaüdçüsü olub. E.Süleymanova 2002-19-cu illərdə Azərbaycanın İnsan Hüquqları üzrə müvəkkili (Ombudsman) vəzifəsini tutub.

Azərbaycanın sabiq müdafiə naziri Dadaş Rzayev mayın 27-də dünyasını dəyişib. O, Azərbaycan Respublikası Veteranlar Şurasının sədri idi.

Tanınmış azərbaycanlı alim, tibb elmləri doktoru, professor, Böyük Britaniya Kral Cəmiyyətinin üzvü, Amerika Birləşmiş Ştatları Puerto-Riko Universitetinin professoru Səbzəli Cavadov iyunun 4-də vəfat edib.

Əməkdar rəssam İsa Məmmədov iyunun 23-də vəfat edib.

Rəssam uzun müddət Azərbaycan Dövlət Rəssamlıq Akademiyasında pedaqoji fəaliyyət göstərib. O, Azərbaycan Rəssamlar İttifaqının və UNESCO-nun nəzdindəki Rəssamlar Birliyinin üzvü idi.

İ.Məmmədov 2021-ci ildə "Əməkdar rəssam" fəxri adına layiq görülmüşdü.

Milli Məclis Aparatının sabiq rəhbəri, həqiqi dövlət müşaviri Səfa Mirzəyev iyulun 22-də vəfat edib.

O, 11 may 2012-ci ildə Azərbaycan Respublikasında dövlət qulluğunda səmərəli fəaliyyətinə görə "Şöhrət", 11 may 2022-ci ildə Azərbaycan Respublikasında dövlət qulluğunda uzunmüddətli səmərəli fəaliyyətinə görə 2-ci dərəcəli "Vətənə xidmətə görə" ordeni ilə təltif edilib.

Tanınmış hərbi jurnalist Ədil Arifoğlu iyulun 28-də vəfat edib.

Tədqiqatçı jurnalist AzTV-nin hərbi vətənpərvərlik redaksiyasının baş rejissoru, hərbi reportyor və müharibə reportyoru, Birinci və İkinci Qarabağ Müharibəsinin hərbi jurnalist kimi iştirakçısı olub.

Lənkəran Dövlət Dram Teatrının aktrisası, Əməkdar artist Zemfira Nəcəfova avqustun 1-də vəfat edib.

Aktrisa teatr sahəsindəki xidmətlərinə görə 1979-cu ildə Azərbaycan SSR Ali Sovetinin fəxri fərmanına, 2015-ci ildə "Azərbaycan Respublikasının Əməkdar artisti" fəxri adına layiq görülmüşdü.

Azərbaycan tarixçisi, tarix elmləri doktoru, professor, Azərbaycan Yazıçılar Birliyinin və Azərbaycan Jurnalistlər Birliyinin üzvü Nəsiman Yaqublu avqustun 25-də vəfat edib.

Azərbaycan Respublikasının baş terapevti, Azərbaycan Tibb Universiteti nəzdində Müdafiə Şurasının sədri, tibb elmləri doktoru, Azərbaycan Tibb Universitetinin "Terapevtik və pediatrik propedevtika" kafedrasının professoru, əməkdar həkim Yaqub Qurbanov sentyabrın 13-də vəfat edib.

O, 2010-cu ildə Respublikanın "Əməkdar həkimi" fəxri adına layiq görülüb.

Əməkdar artist, xanəndə Kifayət Gəncəli sentyabrın 22-də vəfat edib.

O, 2007-ci ildə "Azərbaycan Respublikasının Əməkdar artisti" fəxri adına layiq görülmüşdü. Azərbaycan Televiziyasının "Qızıl fond"unda onun yüzlərlə səs yazısı saxlanılır.

Tanınmış yazıçı-jurnalist, ssenarist, Azərbaycan Kinematoqrafçılar İttifaqının və Teatr Xadimləri İttifaqının üzvü Yaqub Əlioğlu oktyabrın 13-də dünyasını dəyişib.

Yaqub Əlioğlu çoxsaylı publisistik məqalələrin, 10-dan çox kitabın müəllifidir. "Qızıl qələm", "Qızıl dərviş" mükafatlarına layiq görülmüşdü.

"Bakı Metropoliteni" QSC-nin sabiq rəisi Tağı Əhmədov oktyabrın 18-də vəfat edib.

Tağı Əhmədov son illərdə yüksək qan təzyiqindən, şəkərdən və digər xəstəliklərdən əziyyət çəkirmiş.

O, "Fəxri Dəmiryolçu", "Bakı meropoliteni veteranı" döş nişanları, "Şöhrət" ordeni və "Azərbaycan Resbulikasının Əməkdar mühəndisi" fəxri adı və nişanı ilə təltif edilib.

Əməkdar incəsənət xadimi, görkəmli musiqişünas, sənətşünaslıq üzrə fəlsəfə doktoru, professor Sürayə Ağayeva oktyabrın 19-da vəfat edib.

95 elmi əsəri çapdan çıxıb. O, 2012-ci ildə Azərbaycan Respublikasının "Əməkdar incəsənət xadimi" adı almışdı.

Azərbaycanın Xalq artisti Şahlar Quliyev oktyabrın 26-da vəfat edib.

O, 1991-ci ildə "Əməkdar artist", 2005-ci ildə isə "Xalq artisti" fəxri adlarına layiq görülmüşdü.

Tanınmış jurnalist, şair, ssenarist və tərcüməçi Zülfüqar Rüfətoğlu noyabrın 9-da Londonda müalicə aldığı xəstəxanada dünyasını dəyişib.

O, 20 ilə yaxın Londonda BBC radiosunun Azərbaycan xidmətində fəaliyyət göstərib. 1996-cı ildə BBC-nin xətti ilə Ermənistanda, işğal altındakı Şuşa və Xankəndi şəhərlərində olub. Bu səfərdən sonra "Atəşkəs kölgəsində" adlı radiooçerklər silsiləsini qələmə alıb.

Bədii yaradıcılıqla da məşğul olan Zülfüqar Rüfətoğlunun şeirləri mütəmadi olaraq müxtəlif mətbuat orqanlarında dərc olunub. Görkəmli bəstəkarlar Emin Sabitoğlu, Eldar Mansurov, Cavanşir Quliyev onun sözlərinə mahnılar yazıblar.

Azərbaycan Ağırlıqqaldırma Federasiyasının (AAF) sabiq prezidenti Şüa Hüseynov noyabrın 11-də vəfat edib.

O, xidmətlərinə görə "Tərəqqi" medalı və "Əməkdar müəllim" fəxri adlarına layiq görülmüşdü.

Azərbaycan Respublikası Milli Məclisinin I çağırış deputatı Səmayə Piriyeva noyabrın 23-də vəfat edib.

O, bir müddət Sabirabad Rayon İcra Hakimiyyətinin başçısı vəzifəsində də çalışıb (1999-2000).

Alim, Əməkdar müəllim, professor Həsən Feyziyev noyabrın 26-da vəfat edib.

Onun rəhbərliyi altında həyata keçirilmiş elmi-tədqiqat işləri və layihələr bir çox ölkələrdə tətbiq edilir.

Tanınmış violonçel ifaçısı, pedaqoq, professor, Xalq artisti Rasim Abdullayev noyabr 26-da vəfat edib.

Musiqi sahəsinin inkişafındakı xidmətləri yüksək qiymətləndirilən Rasim Abdullayev 1991-ci ildə "Əməkdar artist", 2005-ci ildə "Xalq artisti" fəxri adlarına layiq görülmüşdü.

Tanınmış kino rəssamı, Xalq rəssamı, Azərbaycan Respublikası Prezidentinin fərdi təqaüdçüsü Rafiq Nəsirov noyabrın 29-da vəfat edib.

O, 2000-ci ildə "Əməkdar rəssam", 2007-ci ildə "Xalq rəssamı" fəxri adlarına, Azərbaycan kinematoqrafiyasının inkişafında xidmətlərinə görə isə 2017-ci ildə Azərbaycan Respublikası Prezidentinin fərdi təqaüdünə layiq görülmüşdü.

Azərbaycanın Əməkdar memarı Fəxrəddin Miralayev dekabrın 18-də vəfat edib.

2021-ci il dekabrın 17-də Prezident İlham Əliyev Fəxrəddin Miralayevə Prezidentin fərdi təqaüdünün verilməsi haqqında sərəncam imzalayıb.

Milli təsviri sənətimizdə özünəməxsus yeri olan Xalq rəssamı, pedaqoq Tofiq Ağababayev dekabrın 20-də vəfat edib.

Rəssamın əsərləri Azərbaycanla yanaşı, Rusiya, ABŞ muzeylərində, Kanada, Türkiyə və Fransada şəxsi kolleksiyalarda saxlanılır.

O, 1992-ci ildə "Əməkdar incəsənət xadimi", 2006-cı ildə "Xalq rəssamı" fəxri adlarına, 2008-ci ildə Prezidentin fərdi təqaüdünə layiq görülmüş, 2023-cü ildə isə "Şöhrət" ordeni ilə təltif edilmişdi.

Məhərrəm Əliyev