Baku TV Bakıda 175 nömrəli tam orta ümumtəhsil məktəbində şagirdin pəncərədən yıxılması hadisəsinin səbəblərini və necə baş verdiyini öyrənmək üçün ünvana yollansa da, məktəbin direktorundan açıqlama almaq mümkün olmayıb.
Şagirdlərdən birinin sözlərinə görə, məktəb yoldaşları qapıdan çıxa bilmədikləri halda pəncərədən tullanmaq, yaxud da qapıda dayanan xanımı itələyib qaçmaq kimi təhlükəli yollara əl atırlar.
"Guya dərsdən qaçmaq istəyib. Çantasını atanda o özü də yıxılıb", - deyə şagirdlərdən biri qeyd edib.
Bakıda 175 nömrəli tam orta ümumtəhsil məktəbində pəncərədən yıxılan şagirdin vəziyyəti açıqlanıb.
Oxu.Az-ın sorğusuna cavab olaraq Tibbi Ərazi Bölmələri İdarəetmə Birliyindən (TƏBİB) bildirilib ki, mayın 14-də saat 10:30-da Respublika Təcili və Təxirəsalınmaz Tibbi Yardım Mərkəzinə Yasamal rayonu, 175 nömrəli məktəbdən çağırış qeydə alınıb.
"Çağırış ünvanına təcili tibbi yardım briqadası cəlb olunub. 2009-cu il təvəllüdlü şəxs (kişi cinsli) müştərək travmalar diaqnozu ilə Kliniki Tibbi Mərkəzə hospitalizasiya olunub. Zəruri tibbi xidmətlər göstərilən pasiyentin müalicəsi tibb müəssisəsinin müvafiq şöbəsində davam etdirilir, vəziyyəti stabildir", - deyə məlumatda bildirilir.
Bakıda 175 nömrəli tam orta ümumtəhsil məktəbinin XI sinif şagirdi (müvafiq səbəbdən şagirdin adı qeyd olunmur) mayın 14-də pəncərədən yıxılıb.
Oxu.Az xəbər verir ki, bununla bağlı Bakı Şəhəri üzrə Təhsil İdarəsi (BŞTİ) məlumat yayıb.
Qeyd olunub ki, məktəb rəhbərliyi tərəfindən dərhal təcili-tibbi yardım çağırılıb.
"Şagirdə ilkin tibbi yardım göstərilib və müayinə üçün səhiyyə müəssisəsinə aparılıb. Məsələ ilə əlaqədar şagirdin valideynlərinə və aidiyyəti qurumlara məlumat verilib. Məsələ aidiyyəti qurumlar tərəfindən nəzarətə götürülüb və müvafiq araşdırmalara başlanılıb. Həmçinin məktəbdaxili araşdırma çərçivəsində şagirdin sinif yoldaşları və müəllimlərlə söhbət aparılır.
İctimaiyyətdən araşdırma aparıldığını nəzərə alaraq, məsələyə daha həssas yanaşılması, hadisə barədə rəsmi qurumların açıqlamalarına istinad edilməsi xahiş olunur", - deyə məlumatda vurğulanıb.
