Bakıda liposaksiya prosesini icra edən şəxsin peşə fəaliyyətinə zidd olan görüntüləri ilə bağlı iki qurum reaksiya verib.
Oxu.Az bildirir ki, Baş Prokurorluqda "Dost Estetik Mərkəzi"ndə Güllbədə Abdullayeva tərəfindən icra edildiyi bildirilən əməliyyatla bağlı araşdırma başlanılıb.
Həmçinin faktla bağlı Səhiyyə Nazirliyinin Analitik Ekspertiza Mərkəzi də araşdırma apararaq, məsələyə münasibət bildirib.
Oxu.Az-ın sorğusuna cavab olaraq, Azərbaycan Respublikası Səhiyyə Nazirliyinin Analitik Ekspertiza Mərkəzindən (AEM) qeyd olunud ki, sosial şəbəkələrdə yayılan videogörüntülərdə adı hallanan Abdullayeva Gülbadə Əlqismət qızının adı Səhiyyə Nazirliyinin Tibb işçilərinin vahid reyestrində mövcud deyil və tibbi fəaliyyətlə məşğul olmaq səlahiyyəti yoxdur.
Bildirilib ki, AEM tərəfindən vətəndaşların həyat və sağlamlığına real təhlükə yarada biləcək hallarla bağlı daxil olan müraciətlər əsasında araşdırmalar aparılır və qanunvericiliyə uyğun olaraq plandankənar yoxlamalar həyata keçirilir:
"Daxil olan sorğularda əməliyyatın "Dost Estetik Mərkəzi"ndə keçirildiyi bildirilir. Digər müraciətdə isə həmin şəxsin "UĞUR Estetik Mərkəzi 777" adlı müəssisədə çalışdığı qeyd olunur. Hər iki müəssisə tibb müəssisəsi deyil və müvafiq tibbi fəaliyyət göstərmək üçün lisenziyaları yoxdur.
"Dost Estetik Mərkəzi"nin adı Analitik Ekspertiza Mərkəzinin özəl tibb müəssisələrinin bazasında, eləcə də Dövlət Vergi Xidmətinin Vergi uçotuna alınmış vergi ödəyiciləri barədə məlumat bazasında mövcud deyil".
Həmçinin qeyd olunub ki, araşdırma zamanı sahibkar Xəyalə Aydın qızı İsmayılovaya məxsus "UĞUR Estetik Mərkəzi 777"in lisenziya olmadan tibbi fəaliyyət göstərdiyi müəyyən edilib:
"Yoxlama zamanı kosmetoloji xidmətlər göstərilən, tibbi avadanlıqlarla təchiz edilmiş otaqlarda pasiyent qəbulu və prosedurların icrası faktları aşkarlanıb. "UĞUR Estetik Mərkəzi 777" ilə bağlı AEM tərəfindən 2023-2025-ci illər ərzində dəfələrlə plandankənar yoxlamalar aparılmış, aşkar edilən pozuntularla bağlı ümumilikdə 5 inzibati protokol tərtib edilərək, Azərbaycan Respublikasının "İnzibati Xətalar Məcəlləsi"nin 210.1-ci maddəsi üzrə cərimə olunması barədə qərar qəbul olunub.
Göstərilənlərlə yanaşı, müəssisə lisenziya olmadan fəaliyyətini davam etdirdiyindən, Səhiyyə Nazirliyi tərəfindən hüquq-mühafizə orqanları qarşısında vəsatət qaldırılaraq Xəyalə Aydın qızı İsmayılovaya məxsus "UĞUR Estetik Mərkəzi 777" müəssisəsinin qanunsuz fəaliyyətinin araşdırılması ilə bağlı müraciət edilib".
Aygün Mirakif
Bakıda liposaksiya prosesini icra edən şəxsin peşə fəaliyyətinə zidd olan görüntüləri yayılıb.
Sosial şəbəkədə yayılan görüntülərə əsasən, Gülbadə Abdullayeva və onun həmkarları narkoz altında olan pasiyentin üzərində prosesi icra etdikləri alətlə rəqs edərək "qılınc-qılınc" oynayıblar.
Sözügedən görüntülər sosial şəbəkədə narazılığa səbəb olub. Pasiyentin bədəninin açıq formada videoda əks olunması isə konfidensiallıqla yanaşı, onun hüquqlarının pozulması kimi dəyərləndirilir.
Oxu.Az-ın əməkdaşı yayılan görüntülərlə bağlı açıqlama almaq üçün Gülbadə Abdullayeva ilə əlaqə saxlamağa çalışıb.
Özünü G.Abdullayevanın iş yeri kimi qeyd etdiyi "Dost Estetik Mərkəzi"nin gələcək mətbuat katibi kimi təqdim edən Fatimə Əliyeva məsələ ilə bağlı açıqlama verib:
"Dost Estetik Mərkəzi" hələ fəaliyyətə başlamayıb. Mən isə rəsmi təsdiqlənəndən sonra İctimaiyyətlə əlaqələr şöbəsində çalışacağam. Gülbadə xanım həm də mənim çox yaxın rəfiqəmdir. Həmin videoda kollektiv uğurlu tibbi əməliyyatı sevinərək qeyd edir. O proses "Uğur Estetik Mərkəzi"ndə olub. Həmin video Gülbadə həkim işdən çıxdıqdan sonra onu cəmiyyətin gözündən salmaq üçün qurulan oyundur. Gülbadə həkim oradakı saxtalıqlara görə işindən çıxıb. Gülbadə həkim "Uğur Estetik Mərkəzi"ndə bəzi şəxsləri işindən azad etdirdiyinə görə onlar belə qisas alırlar.
Onun əvvəllər saç ustası olması iddiasına gəlincə, Gülbadə həkim Türkiyədə təhsil alıb. Səhiyyə Nazirliyi araşdırıb, diplomu və fəaliyyəti ilə tanış ola bilər".
Qeyd edək ki, sosial şəbəkədə "Dost Estetik Mərkəzi"nin 12 min izləyicisi olan səhifəsi və bir neçə tibbi prosedurun videogörüntüsü var.
Fatimə Əliyeva qeyd edib ki, həmin səhifəni də videonu yayan şəxslər açıblar, həmin videolar "Uğur Estetik Mərkəzi"ndə icra olunub.
Bildirək ki, sözügedən səhifədəki videolarda, sadəcə, tibbi prosedurların qiyməti var, təhdid xarakterli görüntülərə rast gəlmədik. Onu da vurğulayaq ki, Fatimə Əliyevanın əlaqə nömrəsini də həmin səhifədən əldə etdik.
Məsələ ilə bağlı aidiyyəti quruma sorğu ünvanlanıb.
Qeyd edək ki, görüntüləri sosial şəbəkədə Pərvin Abışova paylaşıb.
Məhərrəm Əliyev
