Bakı şəhəri, Ələkbər Eyvazov adına 275 nömrəli tam orta məktəbdə şagirdin sinif yoldaşı tərəfindən döyülməsi hadisəsi məktəb rəhbərliyi tərəfindən nəzarətə götürülüb.
Bu barədə Oxu.Az-ın sorğusuna cavab olaraq məktəbdən məlumat verilib.
Bildirilib ki, martın 2-də saat 18:00-da 275 nömrəli tam orta ümumtəhsil məktəbinin 7-ci sinfinin iki şagirdi (müvafiq səbəbdən şagirdlərin adları qeyd olunmur) arasında münaqişə baş verib:
"Məsələ ilə bağlı şagirdlərin valideynləri məktəbə dəvət edilib. Valideynlərə övladlarının davranışına diqqətin artırılması ilə bağlı müvafiq tövsiyələr verilib.
Məktəb psixoloqu tərəfindən uşaqlarla müvafiq dəstəkləyici tədbirlər aparılır.
Məktəbdə şagird davranış qaydalarına əməl olunmasına diqqət artırılıb, təlim-tərbiyə prosesinə uyğun olmayan hallara qarşı maarifləndirmə işi genişləndirilib.
Məktəb rəhbərliyi tərəfindən məsələ nəzarətə götürülüb, aidiyyəti qurumlarla birgə müvafiq tədbirlərin görülməsi yönündə işlər davam etdirilir".
Aygün Mirakif
Bakı şəhəri, Ələkbər Eyvazov adına 275 nömrəli tam orta məktəbin şagirdinin sinif yoldaşı tərəfindən döyüldüyü iddia olunub.
Bu barədə Oxu.Az-a sözügedən məktəbin 7d sinfində oxuyan zərərçəkən şagird Ə.Ş-nin anası Aidə Şükürova məlumat verib.
O bildirib ki, övladı tualetdə sinif yoldaşı tərəfindən döyülüb:
"Övladımı Sabunçu rayonunda yerləşən xəstəxanaya aparmışam. Uşağımın bədənində müxtəlif yerlərdə göyərmələr var. Həmçinin qolu oynaqdan çıxıb. Axşam bizə yalandan yıxıldığını dedi. Atası həkimə apardı, evə gələndə sonra etiraf etdi ki, yıxılmayıb, onu sinif yoldaşı döyüb. Döyən uşaq oğlumun dostu olub. Zarafatlaşıblar, bundan sonra o, oğlumu tualetə salaraq döyüb. Uşağım ikinci növbədə oxuyur. Hadisə martın 2-si dərs vaxtı, saat 17 radələrində baş verib. Martın 3-ü direktora şikayətimi bildirmişəm.
Məktəbdə kamera var, amma deyirlər işləmir. Bunu direktordan kamera görüntülərini istəyəndə özü mənə deyib. 2 000 - 3 000 şagirdi olan məktəbin kamerası niyə işləmir?
Direktor da hadisənin olduğunu təsdiq edib. Lakin elə reaksiya verir ki, sanki küçədə bir böcəyin başına nəsə iş gəlib. Uşaq döyülə də bilər, döyə də bilər, amma mən görüntüləri almaq istəyirəm.
Bəlkə mənim uşağımı üç gün sonra başqası yıxıb öldürəcək, kimə nəyi sübut edə biləcəm? Bəlkə günah mənim övladımdadır? Mən bunları bilmək istəyirəm".
Daxili İşlər Nazirliyinin (DİN) Mətbuat Xidmətinin əməkdaşı Lumu İsrəfilli Oxu.Az-a açıqlamasında bildirib ki, məsələ ilə bağlı araşdırma aparılır.
Məsələ ilə bağlı Bakı Şəhər Təhsil İdarəsinə sorğu ünvanlanıb.
Aygün Mirakif
