Dini Qurumlarla İş üzrə Dövlət Komitəsinin, tabeliyində fəaliyyət göstərən Azərbaycan İlahiyyat İnstitutu (Aİİ) və Mənəvi Dəyərlərin Təbliği Fondunun (MDTF) birgə təşkilatçılığı ilə Bakı şəhərində "Müasir din təhsili modelləri: mənəvi dəyərlər və qlobal çağırışlar kontekstində" mövzusunda keçirilən beynəlxalq simpoziumun bağlanış mərasimi keçirilib.
Oxu.Az xəbər verir ki, Aİİ-nin rektoru Aqil Şirinov ikigünlük simpoziumun önəmli mövzuya həsr olunduğunu söyləyərək, tədbir iştirakçılarına təşəkkür edib. Qeyd edib ki, tədbirdə din təhsili sahəsində dinlənilən məruzələr, aparılan müzakirələr bu istiqamətdə daha uyğun modellərin təqdim edilməsinə öz töhfəsini verəcəkdir.
Rektor vurğulayıb ki, müzakirələrdən də məlum oldu ki, dini biliklər doğru mənbələrə əsaslanaraq şərh olunmalı, həmçinin müasir dövrün reallıqları da nəzərə alınaraq cəmiyyətə çatdırılmalıdır. Bildirib ki, din təhsilinin düzgün aparılması dinin özünü təhriflərdən qoruyacaq, milli-mənəvi vəhdətin təmin edilməsinə töhfə verəcək, cəmiyyəti radikal dini tendensiyalardan sığortalayacaq.
Daha sonra çıxış edən MDTF-nin icraçı direktoru Vüsal Göyüşov beynəlxalq simpoziumun müxtəlif ölkələrdən gələn alimlərin, ekspertlərin və mütəxəssislərin dərin təcrübələrinin paylaşılması üçün unikal platforma olduğunu vurğulayıb. Qeyd edib ki, alimlərin çıxışlarından da aydın oldu ki, hər bir ölkənin özünəməxsus din təhsili modeli mövcuddur. Bununla yanaşı, ortaq dəyərlərimiz də kifayət qədər çoxdur.
V. Göyüşov deyib ki, ölkəmiz qədim dini-mədəni irsi, multikultural və tolerant mühiti ilə bu mövzularda regional və qlobal əməkdaşlıq sahəsində aparıcı rol oynayır. Belə tədbirlər yalnız nəzəri müzakirələrlə məhdudlaşmır, həm də praktik araşdırmaların, yeni layihələrin, elmi tədqiqatların əsasını qoyur.
Türkiyənin Kilis 7 Aralık Universitetinin rektoru Zəkəriyyə Akman beynəlxalq simpoziumda iştirak edən 14 xarici ölkə iştirakçısı adından təşkilatçılara təşəkkürünü bildirib. Qeyd edib ki, beynəlxalq simpozium din təhsili sahəsində yalnız elmi müzakirələr deyil, həm də təcrübələrin paylaşılması baxımından unikal bir platforma oldu.
Sonda məruzəçilərə sertifikatlar və hədiyyələr təqdim olunub.
Qeyd edək ki, "Müasir din təhsili modelləri: mənəvi dəyərlər və qlobal çağırışlar kontekstində" mövzusunda keçirilən beynəlxalq simpoziumda Azərbaycan da daxil olmaqla 15 ölkədən 70-dək mütəxəssis alim iştirak edib. Beynəlxalq simpoziuma təqdim edilən məqalələr kitab şəklində çap olunacaq.
"Müasir din təhsili modelləri: mənəvi dəyərlər və qlobal çağırışlar kontekstində" mövzusunda keçirilən beynəlxalq simpoziumun panel sessiyaları yekunlaşıb.
Oxu.Az xəbər verir ki, "Dini savadsızlığın yaranma səbəbləri, doğurduğu fəsadlar (dini fanatizm, xurafat, radikalizm, ekstremizm) və onlarla mübarizə üsulları" adlı panel Özbəkistan Beynəlxalq İslam Akademiyasının birinci prorektoru, siyasi elmlər doktoru Xabibullo Sadıbakosevun moderatorluğu ilə baş tutub.
Paneldə Kırıkkale Universiteti İslam elmləri fakültəsinin professoru Şahin Ahmetoğlu, AMEA-nın akademik Ziya Bünyadov adına Şərqşünaslıq İnstitutunun Din və ictimai fikir şöbəsinin müdiri, fəlsəfə üzrə fəlsəfə doktoru, dosent Elnur Mustafayev, BƏƏ-nin Əl-Eyn Universitetinin müəllimi, pedaqogika üzrə fəlsəfə doktoru Məhəmməd Eyd Məhəmməd Hüseyn Qaraan, Azərbaycan İlahiyyat İnstitutunun Dinşünaslıq kafedrasının müəllimi, sosiologiya üzrə fəlsəfə doktoru Elnur Əzimli və AMEA-nın akademik Ziya Bünyadov adına Şərqşünaslıq İnstitutunun Din və ictimai fikir şöbəsinin böyük elmi işçisi, fəlsəfə üzrə fəlsəfə doktoru Dürdanə Cəfərli məruzə ediblər. Panel iştirakçıları dini savadsızlığın fərdi və ictimai səviyyədə yaratdığı fəsadları dərindən analiz edərək bu problemlə mübarizə üçün təhsil və maarifləndirmənin önəmli olduğunu bildiriblər.
Paralel davam edən "Ənənəvi və yeni mediada din təhsili" adlı panel Albaniya Şərqşünaslıq Mərkəzinin icraçı direktoru Ermal Beqanın moderatorluğu ilə keçirilib. Paneldə Azərbaycan İlahiyyat İnstitutu Dinşünaslıq kafedrasının müdiri, fəlsəfə üzrə fəlsəfə doktoru, dosent Anar Qafarov, Bakı İlahiyyat Kollecinin direktoru, ilahiyyat üzrə fəlsəfə doktoru Mehman İsmayılov, Malayziya Beynəlxalq İslam Universitetinin İslam Bankçılığı və Maliyyəsi İnstitutunun dosenti Şarofiddin Aşurov, Bakı İlahiyyat Kollecinin direktor müavini, fəlsəfə üzrə fəlsəfə doktoru Faiq Əhmədzadə və Azərbaycan Dillər Universiteti Qərb ölkələri üzrə regionşünaslıq kafedrasının baş müəllimi, tarix üzrə fəlsəfə doktoru Bəyim Abdulla çıxış ediblər. Müzakirələrdə rəqəmsal dövrün gətirdiyi imkanlar və təhlükələrlə bağlı geniş fikir mübadiləsi aparılıb, ənənəvi dini təhsil metodlarının əhəmiyyətinə toxunulub, yeni media vasitələrinin (sosial media, video platformalar və s.) din təhsili sahəsindəki rolu və potensialı müzakirə olunub. Müzakirələrdə yeni mediada dini məlumatın düzgün şəkildə yayılmasının və gənclərə etibarlı dini biliklərin çatdırılmasının vacibliyi qeyd olunub.
Dini Qurumlarla İş üzrə Dövlət Komitəsinin, tabeliyində fəaliyyət göstərən Azərbaycan İlahiyyat İnstitutu və Mənəvi Dəyərlərin Təbliği Fondunun birgə təşkilatçılığı ilə Bakı şəhərində "Müasir din təhsili modelləri: mənəvi dəyərlər və qlobal çağırışlar kontekstində" mövzusunda keçirilən beynəlxalq simpozium oktyabrın 23-də panel sessiyalarla davam edib.
Oxu.Az xəbər verir ki, "Din təhsili və əxlaqi dəyərlər" mövzusunda panel sessiyası İndoneziyanın Sunan Kalijaga Dövlət İslam Universiteti Beynəlxalq əlaqələr şöbəsinin müdiri, dosent Vitriani Vitrianinin moderatorluğu ilə keçirilib.
Paneldə Ankara Yıldırım Beyazıt Universiteti İlahiyyat fakültəsinin professoru Murat Demirkol, Rusiya Elmlər Akademiyası İctimai Elmlər üzrə Elmi İnformasiya İnstitutu Fəlsəfə şöbəsinin müdiri, professor Sergey Melnik, AMEA-nın akademik Ziya Bünyadov adına Şərqşünaslıq İnstitutu Din və ictimai fikir şöbəsinin aparıcı elmi işçisi, fəlsəfə üzrə fəlsəfə doktoru Qadir Səfərov, Malayziya İslam Elmləri Universiteti Əsas dillərin tədqiqi fakültəsinin baş müəllimi, pedaqogika üzrə fəlsəfə doktoru Hayati İsmail, Azərbaycan İlahiyyat İnstitutu Dillər və ictimai fənlər kafedrasının baş müəllimi Ənvər Mustafayev çıxış ediblər.
Paralel davam edən "Dünyəvi dövlətdə din təhsili" adlı panel Ankara Yıldırım Beyazıt Universiteti İlahiyyat fakültəsinin müəllimi, ilahiyyat üzrə fəlsəfə doktoru Abdullah Demirin moderatorluğu ilə baş tutub. Paneldə Şimali Qafqazda dini ənənələr, onların mədəni spesifikliyi və dinlərarası dialoqun müqayisəli tədqiqi üzrə UNESCO kafedrasının bölmə rəhbəri, Qafqaz Xalqları Dostluğu İnstitutunun elmi işlər və beynəlxalq əlaqələr üzrə prorektoru, dosent Gülçöhrə Seyidova, Kırıkkale Universiteti İslam elmləri fakültəsinin dosenti Adem Yıldırım, Azərbaycan İlahiyyat İnstitutu Dillər və ictimai fənlər kafedrasının dosenti, fəlsəfə üzrə fəlsəfə doktoru Elvüsal Məmmədov, AMEA-nın akademik Ziya Bünyadov adına Şərqşünaslıq İnstitutunun aparıcı elmi işçisi, fəlsəfə üzrə fəlsəfə doktoru, dosent Leyla Məlikova və Azərbaycan İlahiyyat İnstitutunun Dinşünaslıq kafedrasının müəllimi, fəlsəfə üzrə fəlsəfə doktoru Aliyə Mürsəlova çıxış ediblər.
Paralel davam edən "Din təhsilinə müxtəlif yanaşmalar" adlı panel Ankara Universiteti İlahiyyat fakültəsinin İslam məzhəbləri tarixi müəllimi, professor Sönmez Kutlunun moderatorluğu ilə keçirilib. Paneldə AMEA-nın Fəlsəfə və Sosiologiya İnstitutu İslam fəlsəfəsi və dinşünaslıq şöbəsinin aparıcı elmi işçisi, fəlsəfə üzrə fəlsəfə doktoru, dosent Radif Mustafayev, AMEA-nın akademik Ziya Bünyadov adına Şərqşünaslıq İnstitutu Din və ictimai fikir şöbəsinin aparıcı elmi işçisi, ilahiyyat üzrə fəlsəfə doktoru, dosent Aslan Həbibov, Kırıkkale Universiteti İslam elmləri fakültəsinin müəllimi, fəlsəfə üzrə fəlsəfə doktoru Vahdeddin Şimşek, Azərbaycan İlahiyyat İnstitutu rektorunun köməkçisi, AMEA-nın Fəlsəfə və Sosiologiya İnstitutunun doktorantı Emin Orucov mövzu ilə bağlı fikirlərini bölüşüblər.
Panellərdə din təhsili sahəsindəki aktual məsələlər və çağırışlar geniş müzakirə olunub. Panel iştirakçıları din təhsilinin həm əxlaqi və mənəvi dəyərlərin formalaşmasındakı rolu, həm də dünyəvi cəmiyyətlərdə dini təhsilin hüquqi və sosial çərçivələrini müzakirə edərək, bu sahədəki təcrübələr və nəzəri yanaşmaları bölüşüblər. Həmçinin, müxtəlif mədəniyyətlərdə din təhsilinin tarixi və ənənəvi formaları ilə müasir tələblər arasındakı əlaqə və uyğunlaşma məsələləri ətrafında fikir mübadiləsi aparılıb.
Simpozium panel sessiyalarla davam edəcək.
Xatırladaq ki, ötən gün Bakıda keçirilən "Müasir din təhsili modelləri: mənəvi dəyərlər və qlobal çağırışlar kontekstində" beynəlxalq simpoziumun açılış mərasimi baş tutub.
