Bakıda özəl xəstəxanada baş verən qadın ölümü ilə bağlı RƏSMİ AÇIQLAMA

Tibbi Ərazi Bölmələrini İdarəetmə Birliyi (TƏBİB) Bakıda özəl klinikada baş verən ölüm hadisəsi barədə açıqlama verib.

TƏBİB-dən Oxu.Az-ın sorğusuna cavab olaraq bildirilib ki, iyulun 9-u saat 02:40-da 1992-ci il təvəllüdlü şəxs (qadın cinsli) təcili tibbi yardım vasitəsilə ishal şikayəti ilə Sabunçu Tibb Mərkəzinin Yoluxucu xəstəliklər şöbəsinə yerləşdirilib və zəruri tibbi xidmət göstərilib:

"Xəstə daha sonra öz istəyi ilə ambulator müalicə üçün evə buraxılıb.

Sözügedən xəstə üçün özəl tibb müəssisəsindən Təcili və Təxirəsalınmaz Tibbi Yardım Mərkəzinə iyulun 9-da çağırış daxil olub və hadisə yerinə dərhal reanimasiyon briqada cəlb olunub".

Qeyd edək ki, xəstənin özəl tibb müəssisəsində öncə klinik ölümü və birgə aparılan bütün reanimasiyon tədbirlərə baxmayaraq bioloji ölümü qeydə alınıb.

Nəzrin Vahid

16:15

Bakıda yerləşən özəl xəstəxana 32 yaşlı qadının ölüm faktını təsdiqləyib.

"Stimul Hospital"dan Oxu.Az-a bildirilib ki, 1992-ci il təvəllüdlü Aytən Fəxrəddin qızı Cabbarlı klinikaya ağır vəziyyətdə daxil olub:

"Xəstə klinikaya daxil olarkən dəri örtüyü avazımış vəziyyətdə, arterial təzyiqi 60/20 mm civə sütunu, saturasiyası 30, nəbzi 150/160 olub. Xəstənin ağzı və burnundan qan gəlib.

Verilən məlumatlara görə, onun evdə dörd gün qızdırması olub. Bu səbəbdən iyul ayının 8-dən 9-na keçən gecə 3 Saylı Şəhər Klinik Xəstəxanasına müraciət ediblər. Mədəsi yuyulub, evə buraxılıb. Buna baxmayaraq, qusması davam edib.

09.07.2024-cü il saat 8 rədələrində bizim klinikaya ağır vəziyyətdə müraciət ediblər. Xəstəyə mümkün olan bütün reanimasiya tədbirlər göstərilib və dərhal "103" Çağrı Mərkəzinə müraciət edilib. Üç fərqli təcili tibbi yardım briqadası klinikaya gəlmiş xəstənin vəziyyətini qiymətləndirib və onun növbəti xəstəxanalara transferindən imtina edib".

"Hətta xəstə yaxınları öz istəkləri ilə klinikamıza həkim-reanimatoloq dəvət edib. O, xəstənin ağır vəziyyətdə olduğunu və bütün reanimasiya tədbirlərinin düzgün aparıldığını qeyd edib. Yaxınları tərəfindən Mərkəzi Klinikadan təcili tibbi yardım briqadası çağırılıb və xəstənin vəziyyətinin ağır olması səbəbindən transferindən imtina edilib".

Xəstəxanadan qeyd olunub ki, bu hadisə ilə bağlı dərhal Sabunçu Rayon Polis İdarəsinin 13-cü Polis Bölməsinə və Sabunçu Rayon prokurorluğuna məlumat veriblər:

"Onlar klinikamıza gəlib, bütün bu hadisələrdə bizimlə birlikdə iştirak ediblər. Tərəfimizdən aparılan bütün reanimasiya tədbirlərinə baxmayaraq, xəstənin həyatını xilas etmək mümkün olmayıb".

Faktla bağlı Sabunçu Rayon Prokurorluğunda araşdırma aparılır.

Nəzrin Vahid

13:22

Bakıda yerləşən "Stimul Hospital"da 32 yaşlı qadının ölümü ilə bağlı bəzi detallar məlum olub.

Oxu.Az-ın əldə etdiyi məlumata görə, 1992-ci il təvəllüdlü Aytən Fəxrəddin qızı Cabbarlı iyulun 9-da klinikada vəfat edib. Onun meyiti ekspertiza müayinəsindən keçib və üzərində heç bir zorakılıq əlaməti aşkarlanmayıb.

Özəl xəstəxana isə xəbəri təkzib edib. "Stimul Hospital"dan Oxu.Az-a bildirilib ki, orada belə bir hadisə baş verməyib.

Nəzrin Vahid

11:24

Bakıda fəaliyyət göstərən özəl klinikada ölüm hadisəsi baş verib.

Lent.az xəbər verir ki, hadisə "Stimul Hospital"da qeydə alınıb.

Klinikaya gələn 1992-ci il təvəllüdlü Aytən Fəxrəddin qızı Cabbarlı orada ölüb.

A.Cabbarlının ölüm səbəbi hələlik açıqlanmır.

Ölüm faktı ilə bağlı prokurorluq araşdırma aparır.