"Çində olanda şahidi oldum, onların məşhur "CCTV+" xəbər agentliyinin bizim fəaliyyətimizdən fərqlənən üstünlüyü yox idi. Bircə innovativ onu gördüm ki, onlar öz yayımlarını 50-dən çox ölkəyə satırlar və onların müxbirlərinin danışığı o yayımı alan ölkənin dilində subtitrlə təqdim olunur. Məsələn, müxbir Çin dilində danışanda o yayımı biz almışıqsa, avtomatik Azərbaycan dilində subtitr görəcəyik".
Oxu.Az xəbər verir ki, bu fikirləri "Real" TV-də yayımlanan "Media Masası" verilişində Baku TV-nin direktoru Ramin Cəfərov səsləndirib.
R.Cəfərov innovativ yeniliklərdən danışarkən bildirib ki, Çin artıq yayımı onu alan ölkənin dilində səsləndirməyi də planlayır:
"Həmçinin, orada sərgidə də iştirak elədik. Uçan avtomobillərlə, taksilərlə tanış olduq. Lakin yenə də onların mediasında süni intellektə uduzmaq qorxusu yoxdur".
R.Cəfərov süni intellektlə yanaşı, televiziyadakı dəyişikliklər məsələlərinə də toxunub. Onun sözlərinə görə, hazırda Baku TV də transformasiyaya uğrayıb:
"Mən düşünürəm ki, biz daha çox analizlər aparmalıyıq, analitika verməliyik. Nələr ola bilər, ümumiyyətlə, bizi nələr gözləyir? Bu cür polemikalar insanlar üçün çox maraqlıdır. Ona görə ki, geosiyasi gündəm hər gün dəyişir və Baku TV buna görə insanlara maraqlıdır".
