"Mən 2021-ci ilin noyabrında Hacıqabul Rayon Məhkəməsi tərəfindən 4 il müddətinə azadlıqdan məhrum edilmişəm. Azadlığa çıxandan sonra Sosial Müdafiə Fondunun rayon filialına yaxınlaşıb birdəfəlik müavinətlə bağlı müraciət etdim. Amma qanunsuz olaraq mənə həmin məbləği verməkdən imtina etdilər".
Oxu.Az xəbər verir ki, bu şikayətlə "Qafqazinfo"ya da Hacıqabul sakini Rais Məhərrəmov müraciət edib.
Onun iddiasına görə, dəfələrlə sözügedən problemlə bağlı aidiyyəti quruma müraciət etsə də, mənfi cavab alıb:
"Bütün qanuni sənədlərimi hazırlayıb fonda təqdim etmişəm. Mənə dövlət 1 600 manat pul verməlidir. Fonddan deyirlər ki, sən həbsdə bir il altı ay olmusan. Halbuki mən 4 il həbs cəzası çəkmişəm. Fondun qaynar xəttinə də dəfələrlə zəng etmişəm, eyni cavabı verirlər.
Bu, dördüncü məhkumluğumdur, əvvəlki 3 dəfədə müavinət almışam. Həmçinin tanıdığım bir neçə dəfə məhkum olmuş şəxs də həmin məbləği aldı, lakin mənə verməkdən imtina edirlər".
Problemlə bağlı Dövlət Sosial Müdafiə Fonduna ünvanlanan sorğuya belə cavab verilib:
"Rais Rahil oğlu Məhərrəmova cəza çəkməkdən azad olunmuş şəxs kimi 2021-ci il mayın 21-də birdəfəlik pul müavinəti təyin edilərək ödənilib.
Lakin bir neçə aydan sonra Hacıqabul Rayon Məhkəməsinin 10.11.2021-ci il tarixli hökmünə əsasən, ona cəzanın əvvəli 21.07.2021-ci tarixindən hesablanmaqla 1 il 6 ay müddətinə azadlıqdan məhrumetmə cəzası təyin olunub. Bununla əlaqədar adıçəkilən şəxs təkrar sözügedən birdəfəlik pul müavinətinin əldə olunması üçün müraciət edib. Qanunvericiliyin tələblərinə və formalaşmış məhkəmə təcrübəsinə uyğun olaraq, qeyd edilən birdəfəlik pul müavinətinin təkrar verilməsindən imtina edilib".
DSMF-dən bildirilib ki, vətəndaşa birdəfəlik müavinətin təkrar təyin olunması mümkün deyil:
"Qanunvericiliyin və məhkəmənin mövqeyinə əsasən sosial adaptasiya tədbirləri yalnız dövlət tərəfindən birtərəfli həyata keçirilməli tədbirlər deyil, məhz qarşılıqlı öhdəliklərin mövcud olduğu tədbirlər sistemini nəzərdə tutur. Həmin qarşılıqlı öhdəliklər çərçivəsində barəsində sosial adaptasiya tədbirləri tətbiq edilən şəxsdən də müvafiq qaydada davranış gözlənilir. Legitim olan həmin gözlənti minimal davranış qaydalarını da ehtiva edir. Bu səbəbdən də, Rais Məhərrəmova sözügedən birdəfəlik müavinətin təkrar təyin olunması mümkün deyil".
