"Qapqara" verilişinin yeni buraxılışının qonağı ilahiyyatçı Elşad Miri olub.
O, namazın mahiyyətindən söz açıb:
"Allah "Qurani-Kərim"də, sadəcə, "namaz qılın" demir, onu düzgün şəkildə yerinə yetirməyi əmr edir. Çünki "Quran"a nəzər yetirəndə müşriklərin də namaz qılmalarından bəhs edildiyini görürük. Yəni o dövrdə Məhəmməd peyğəmbər yeni bir ibadət növü gətirmədi, mövcud olanı islah etdi. Başqa sözlə desək, yanlışları aradan qaldıraraq insanlara düzgün formada çatdırdı".
İlahiyyatçı həmçinin "Ağıl və vəhy toqquşanda hansını qurban verərsiniz?" sualına aydınlıq gətirib. O bildirib ki, ağıl ilə vəhyin toqquşması mümkün deyil:
"Çünki vəhyi göndərən də, insanı yaradan da Allahdır. Əgər burada ziddiyyət görürüksə, bu bizim hələ başa düşmədiyimiz məqamların olmasından irəli gəlir. Yəni araşdırmalı olduğumuz məsələlər var. Biz çox vaxt bunlara cavab tapa bilmədiyimiz üçün "inanmaq lazımdır" deyirik. Amma Allah bizdən birinci inanmağı yox, bilməyimizi istəyir".
