Əməkdar artist Cabir İmanovla vida mərasimi sabah saat 12:30-da Dövlət Təhlükəsizliyi Xidmətinin (DTX) Mədəniyyət Mərkəzində olacaq.
Oxu.Az bildirir ki, bu barədə "Report"a aktyorun sənət dostu Murad Dadaşov məlumat verib.
Onun sözlərinə görə, vida mərasiminin ardınca cənazə Yasamal rayonundakı Qurd qapısı qəbiristanlığına aparılacaq və orada dəfn olunacaq.
Qeyd edək ki, Cabir İmanov sentyabrın 29-da günorta saatlarında vəfat edib.
Əməkdar artist Cabir İmanovun dəfn yeri açıqlanıb.
Oxu.Az "Unikal"a istinadən xəbər verir ki, mərhum sənətkar paytaxtdakı Qurd qapısı qəbiristanlığında torpağa tapşırılacaq.
Onunla vida mərasimi Nərimanov rayonunda yerləşən Cümə məscidində baş tutacaq.
Əməkdar artist Cabir İmanovun nəşi Əjdərbəy məscidindən evinə aparılıb.
Oxu.Az xəbər verir ki, onunla vida mərasimi sabah keçiriləcək.
Əməkdar artist Cabir İmanovun nəşi təşrih üçün Səhiyyə Nazirliyi Məhkəmə-Tibbi Ekspertiza və Patoloji Anatomiya Birliyinə aparılıb.
Oxu.Az-ın əməkdaşı bildirir ki, daha sonra onun nəşi Əjdərbəy məscidinə aparılıb.
Aygün Mirakif
Əməkdar artist Cabir İmanov məşq prosesində ölməyib.
Oxu.Az xəbər verir ki, bu barədə jurnalist Elvin Elxan paylaşım edib.
O, C.İmanovun vəfatına şahid olduğunu bildirib:
"Gözəl insan. Zala daxil oldu, bir neçə dəqiqə sonra oturdu və yıxıldı. Həyatımın ən böyük travmasını aldım. İlk dəfə birinin ölümünün şahidi oldum. O adam ki, ən gözəl məşq yoldaşı idi".
Məhərrəm Əliyev
Tibbi Ərazi Bölmələrini İdarəetmə Birliyi (TƏBİB) Əməkdar artist Cabir İmanovun ölümü ilə bağlı məlumat yayıb.
Qurumdan Oxu.Az-a bildirilib ki, bu gün saat 13:38-də Səbail rayonu, Üzeyir Hacıbəyov küçəsindən əməkdar artist Cabir İmanovun (1976-cı il təvəllüdlü) səhhətinin pisləşməsi (yıxılma) səbəbi ilə Respublika Təcili və Təxirəsalınmaz Tibbi Yardım Mərkəzinə çağırış daxil olub:
"Çağırış ünvanına dərhal təcili tibbi yardım briqadası cəlb olunub. Saat 13:50-də briqada tərəfindən Əməkdar artistin həkiməqədər ölüm faktı qeydə alınıb".
Məhərrəm Əliyev
Əməkdar artist Cabir İmanovun Bakıdakı idman zalında vəfat etməsi ilə bağlı bəzi təfərrüat məlum olub.
Oxu.Az "Qafqazinfo"ya istinadən xəbər verir ki, baş vermiş hadisə idman zalının kameraları vasitəsilə anbaan lentə alınıb.
Görüntülərdən məlum olur ki, Əməkdar artist məşq zalında müvazinətini itirərək yıxılıb. Onun yaxınlığındakı şəxslər dərhal kömək etməyə çalışaraq ürək masajı ediblər.
C.İmanovun ürək fəaliyyətini bərpa etmək üçün ona elektroşok da tətbiq edilib. Lakin bu prosesin 20 dəqiqə davam etməsinə baxmayaraq, 49 yaşlı aktyorun həyatını xilas etmək mümkün olmayıb.
Əməkdar artist Cabir İmanov vəfat edib.
Oxu.Az "Qafqazinfo"ya istinadla xəbər verir ki, o bu gün paytaxtın Səbail rayonu, Üzeyir Hacıbəyov küçəsində yerləşən idman zalında infarkt keçirib.
Hadisə yerinə təcili tibbi yardım briqadası çağırılsa da, 49 yaşlı aktyorun həyatını xilas etmək mümkün olmayıb.
