"İDDA Awards" müsabiqəsi 4 ildir keçirilir və bu müddət ərzində müvafiq mükafatlandırma prosesində 500-ə yaxın iştirakçı qatılıb. Onlar nominasiyalar üzrə uyğun yerlərə layiq görülüblər".
Oxu.Az xəbər verir ki, bu fikirləri Azərbaycanın innovasiya ekosistemində ən mühüm hadisələrdən biri olan "İDDA Awards" müsabiqəsinin mükafatlandırma mərasimində İnnovasiya və Rəqəmsal İnkişaf Agentliyinin (İRİA) İdarə Heyətinin sədri Fərid Osmanov deyib.
O bildirib ki, cari ildə həyata keçirilən bu tədbir innovasiya sistemi tərəfindən də böyük maraqla qarşılanıb:
"Bu il ərzində 4 ay davam edən nominasiyalar prosesi çərçivəsində artıq 162 müraciət qeydə alınıb. Həmin müraciətlər üzrə 58 mindən çox vətəndaş tərəfindən açıq ictimai səsvermə həyata keçirilib və bugünkü tədbir çərçivəsində də yerlər üzrə mükafatlar elan ediləcək".
F.Osmanov deyib ki, bu il innovasiya ekosisteminin quruculuğu istiqamətində bir sıra tədbirlər həyata keçirilib:
"Xüsusilə infrastruktur tədbirləri cari il ərzində innovasiya mərkəzlərinin şaxələndirilməsi istiqamətində tərəfimizdən dəstəklənib. Bakıda və regionlarda da startapların ideyadan real həll mərhələsinə qədər olan zəncirinin dəstəklənməsi məqsədilə ali təhsil müəssisələri ilə birgə müvafiq innovasiya mərkəzləri yaradılıb. Bu məkanlar artıq aktiv şəkildə insanların toplaşma nöqtələrinə çevrilib".
O əlavə edib ki, bu yöndə insan kapitalının formalaşdırılması çox mühüm elementdir:
"Bu məqsədlə bir çox proqramlar həyata keçirilib. Ötən müddət ərzində 10 mindən artıq gənc agentliyin həyata keçirdiyi təlim proqramlarından yararlanıb və proses bu gün də davam edir. Hazırda da aktuallığını qoruyan və müraciətlərin toplandığı təhsil proqramlarımız mövcuddur ki, bunlar universitetlər və digər təhsil ocaqları ilə birgə həyata keçirilir. Cari il ərzində maliyyə ekosisteminə çıxışın təmin edilməsi, maliyyə vəsaitlərinə əlçatanlığın artırılması və fondların yaradılması istiqamətində də fəaliyyətlər reallaşdırılıb".
Qeyd edək ki, "İDDA Awards" Azərbaycanda innovasiyaların təşviqinə, startaplar tərəfindən yaradılan qabaqcıl texnoloji həllərin tanıdılmasına və innovativ layihələrin həm dövlət, həm də özəl sektorda tətbiqinin stimullaşdırılmasına xidmət edən mühüm platformadır.
Müsabiqədə iştirak edən və xüsusilə də qalib olan layihələr üçün ekosistemdə tanınmaqla yanaşı, şəbəkələşmə və yeni tərəfdaşlıqların qurulması baxımından geniş imkanlar yaranır.
Məhərrəm Əliyev
