Cəlilabad rayonunun 19 dağlıq kəndində, həmçinin Biləsuvar rayonunun bir sıra ərazilərində elektrik enerjisinin verilişində fasilələr qeydə alınıb.
Oxu.Az xəbər verir ki, bu vəziyyətə bölgədə müşahidə olunan güclü qar səbəb olub.
"Azərişıq" ASC-dən məsələ ilə bağlı Oxu.Az-ın sorğusuna cavab olaraq bildirilib ki, bölgələrdə intensiv qar yağması nəticəsində bəzi elektrik xətlərində nasazlıqlar baş verib.
"Bəzi ərazilərdə ağaclar elektrik xətlərinin üzərinə aşıb. Həmin ərazilərdə elektrik enerjisinin bərpası istiqamətində zəruri bütün tədbirlər həyata keçirilir. İşçi heyəti hadisə yerlərinə göndərilib, lazımi əlavə material və texnika təmin edilib. Hazırda digər dövlət qurumları ilə birgə müvafiq bütün işlər aparılmaqdadır.
Bir çox kəndlərdə artıq enerji təchizatı bərpa olunub, digər istiqamətlərdə isə iş davam etdirilir", - məlumatda qeyd edilib.
Əzizə İsmayılova
