"Sosial şəbəkələrdə yayılmış görüntülərlə bağlı tərəfimizdən araşdırma aparılıb".
Bunu Oxu.Az-a açıqlamasında Baş Dövlət Yol Polisi İdarəsinin (BDYPİ) bölmə rəisi Elvin Hacıyev verib.
"Qaydaları pozan sürücü barəsində qanunamüvafiq tədbir görülüb. Bu cür qanun pozuntuları yalnız inzibati məsuliyyət yaratmır, eyni zamanda sürücünün özü ilə yanaşı sərnişinlərin, eləcədə digər hərəkət iştirakçılarının həyat və sağlamlığı üçün birbaşa təhlükə yaradır.
Sürücülərin diqqətinə bir daha çatdırırıq ki, yol hərəkəti təhlükəsizliyinin təmin edilməsi, hərəkət iştirakçılarının həyat və sağlamlığının qorunması məqsədilə qanunvericiliyin tələblərinə qeyd-şərtsiz əməl etsinlər", - deyə E.Hacıyev vurğulayıb.
Xırdalan şəhərində sərnişin avtobusunun yol hərəkəti qaydalarını kobud şəkildə pozması sürücülərin narazılığına səbəb olub.
Oxu.Az xəbər verir ki, bununla bağlı sosial şəbəkədə videogörüntülər yayılıb.
Bildirilib ki, 515 nömrəli marşrut xətti üzrə hərəkət edən bəzi sərnişin avtobusları tez-tez yol hərəkəti qaydalarını pozur və digər hərəkət iştirakçıları üçün təhlükə yaradan manevrlər edirlər.
"Bu cür qayda pozuntuları həm digər sürücülərin, həm də sərnişinlərin həyatını riskə atır", - deyə şikayətdə qeyd olunub.
Məsələ ilə bağlı aidiyyəti üzrə sorğu verilib.
