Buz bağlamış Bakı-Şamaxı yolunda SON VƏZİYYƏT

Bakı-Şamaxı avtomobil yolunda nəqliyyat vasitələrinin hərəkəti bərpa olunub.

Oxu.Az xəbər verir ki, bu barədə Daxili İşlər Nazirliyinin Mətbuat Xidmətinin Şəki regional qrupundan məlumat verilib.

Bildirilib ki, qarlı hava şəraiti ilə əlaqədar Bakı-Şamaxı avtomobil yolunda nəqliyyat vasitələrinin hərəkətində yaranmış çətinliklə bağlı əraziyə Yol Patrul Xidmətinin və digər aidiyyəti qurumun əməkdaşları cəlb olunublar.

"Meteoroloji şəraiti nəzərə alaraq bir daha sürücülərə tövsiyə olunur ki, yola çıxmazdan əvvəl nəqliyyat vasitələrinin sazlığına diqqət yetirsinlər, sürət həddini hava şəraitinə uyğun seçsinlər", - deyə məlumatda qeyd olunub.

13:11

Qarlı hava səbəbindən Bakı-Şamaxı yolunun Qobustan rayonundan Ceyrankeçməz kəndi ərazisindən keçən hissəsində nəqliyyat vasitələrinin hərəkətindəki çətinlik aradan qaldırılıb.

Bu barədə Oxu.Az-a açıqlamasında Azərbaycan Avtomobil Yolları Dövlət Agentliyinin (AAYDA) İctimaiyyətlə əlaqələr şöbəsinin rəisi Anar Nəcəfli məlumat verib.

"Hazırda vəziyyət normaldır. Gediş-gəlişdə problem yoxdur. Dünən axşam saatlarından başlayaraq qarın yağması müşahidə edilib. Səhər saatlarında artıq buzlaşma qeydə alındı. Dərhal əraziyə maşın-mexanizm texnikaları cəlb olundu. Buzlaşmış ərazilərə duz və qumun qarışıq formada səpilməsi ilə hərəkət təmin edildi. Hazırda hərəkətdə problem müşahidə edilmir.

Axşam saatlarına doğru yenidən şaxtanın olması səbəbindən sürücülərdən xahiş edirik ki, qış fəslinə uyğun olaraq avtomobilini təchiz etməmiş sürücülər dağlıq və dağətəyi yollardan istifadə etməsinlər. Çünki biz nə qədər tədbir görsək də, həmin sürücülərin hərəkətində mütləq şəkildə problem yaranacaq. O problem də digər hərəkət iştirakçılarına maneə törədəcək", - deyə A.Nəcəfli qeyd edib.

Məhərrəm Əliyev

11:06

Gecə saatlarından respublika ərazisində havanın kəskin dəyişməsi bir çox avtomobillərin yollarda qalmasına səbəb olub.

Oxu.Az-a verilən məlumata görə, Bakı-Şamaxı yolunun Qobustan rayonundan Ceyrankeçməz kəndi ərazisindən keçən hissəsində vəziyyət daha ağır olub.

Belə ki, gecə saatlarında başlayan güclü qar və şaxta nəticəsində yol buz bağlayıb. Bu səbəbdən 100-ə yaxın nəqliyyat vasitəsi saatlarla yolda qalıb. Bəzi avtomobillər isə sürüşərək yoldan çıxıb. Sürücülər çətin anlar yaşayıb, bəziləri isə gecəni öz avtomobillərində keçirməli olublar.

Hazırda da həmin ərazidə nəqliyyat vasitələrinin hərəkətində çətinlik yaşandığı bildirilir.

Əzizə İsmayılova