Şahid: “Meyit tapılmamışdan əvvəl əmisi dedi ki, ola bilər Nərminin paltarını sizin qapıya atarlar”

Tovuzun Dondar Quşçu kəndində 10 yaşlı Nərmin Quliyevanı qətlə yetirməkdə ittiham olunan İlkin Süleymanovun cinayət işi üzrə məhkəmə prosesi davam etdirilib.

APA xəbər verir ki, Gəncə Ağır Cinayətlər Məhkəməsinin hakimi Dadaş İmanovun sədrliyi ilə keçirilən bugünkü iclasda müdafiə tərəfinin şahidləri dindirilib.

İstintaq materiallarında göstərilib ki, İlkin Süleymanovun alt paltarlarında Nərmin Quliyevaya aid izlər aşkar olunub. İttiham olunan tərəf üzərində izlərin qaldığı iddia olunan alt paltarının İlkin Süleymanov həbs olunduqdan sonra alındığını bildirib.

Bu epizodlarla bağlı bu gün məhkəmədə Tovuz bazarında paltar satışı ilə məşğul olan Müslüm Əliyev ifadə verib.

Şahidin sözlərinə görə, həqiqətən də İlkin Süleymanov həbs olunandan iki gün sonra qardaşı Bəhruz Süleymanov onun mağazasından alt paltarları alıb: “Yanvar ayının 7-si Bakıdan qayıtmışdım, səhəri gün İlkinin qardaşı Bəhruz mağazaya gəlib, İlkin üçün alt paltarı verməyimi istədi. Dedi ki, İlkin polisdədir, paltarları ora aparacağam. Hətta paltarların ölçüsünü də yoxladıq ki, İlkinin əyninə olar, yoxsa yox”.

Bəhruz Süleymanov da eyni epizod üzrə ifadə verib. O da alt paltarını qardaşı həbs olunduqdan sonra aldığını deyib.

Məhkəmədə kənd sakini Rüfət Əliyev də ifadə verib.

Şahid deyib ki, Nərmin Quliyevanın meyiti tapılmamışdan əvvəl əmisi Arif Quliyev onlara gələrək Nərminin paltarının, ya ayaqqabısının onların qapısına atıla biləcəyini bildirib: “Nərminin meyiti tapılmazdan 3 gün əvvəl əmisi Arif bizə gəlib dedi ki, ola bilər Nərminin paltarını, ya da ayaqqabısını sizin qapıya atarlar. Gözdə-qulaqda olun, nəsə atsalar, bizə xəbər verin”.

Şahid Nərminin paltarının kiminsə qapısına atılacağını və ya öldüyünü Arifin haradan bilməsi ilə bağlı sualın cavabını bilmədiyini deyib.

Prosesin davamında İlkin Süleymanovun bacısı oğlu Nicat Eminov ifadə verib. Şahidin sözlərinə görə, Nərmin itkin olan müddətdə dayısı tərəfindən saxlanıldığı deyilən otaqda paltar geyinib. Həmin vaxt isə orda heç kim olmayıb: “Dekabr ayının 15-də rayona toya getmişdim. Həmin gün Nərminin saxlanıldığı deyilən otaqda kostyum geyinmişəm. Yanımda dostum var idi, o da şahiddir”.

Proses sabah davam etdiriləcək.

Xatırladaq ki, 2019-cu ilin noyabrın 19-dan itkin düşən Tovuz rayonunun Dondar Quşçu kənd sakini, 10 yaşlı Nərmin Quliyevanın qətlə yetirilərək yandırılan meyiti 2020-ci il yanvarın 6-da kənd ərazisində aşkar edilib.

Daxili İşlər Nazirliyi, Dövlət Təhlükəsizliyi Xidməti və Baş Prokurorluğun əməkdaşlarından ibarət istintaq-əməliyyat qrupu tərəfindən cinayətin açılması istiqamətində həyata keçirilmiş təxirəsalınmaz istintaq hərəkətləri və əməliyyat-axtarış tədbirləri nəticəsində cinayəti törətməkdə şübhəli bilinən Dondar Quşçu kənd sakini, 1973-cü il təvəllüdlü Süleymanov İlkin İbrahim oğlu tutularaq istintaqa cəlb edilib.

İş üzrə çoxsaylı şahidlər dindirilib, məhkəmə-tibbi, məhkəmə-bioloji, məhkəmə-kimyəvi ekspertizaları təyin edilib və digər zəruri istintaq hərəkətləri aparılıb.

İlkin Süleymanova Cinayət Məcəlləsinin 120.2.4 (xüsusi amansızlıqla qəsdən adam öldürmə), 120.2.9 (təqsirkar şəxs üçün aşkar surətdə köməksiz vəziyyətdə olan adamı qəsdən öldürmə), 144.3 (adam oğurluğu) və başqa maddələr ilə təqsirli bilinərək barəsində cinayət işi açılıb.