Səhiyyə müəssisələrində aparılan planlı yoxlamalar zamanı aşkarlanan nöqsanların aradan qaldırılması üçün müvafiq təkliflər verilir.
Oxu.Az xəbər verir ki, bu barədə Səhiyyə Nazirliyinin Respublika Gigiyena və Epidemiologiya Mərkəzinin baş hüquqşünası Kamil Dəmirli nazirliyin rəsmi "Instagram" səhifəsində canlı yayımda çıxışı zamanı məlumat verib.
Onun sözlərinə görə, dövlət müəssisələrində planlı yoxlamalar həyata keçirilir, aşkarlanan nöqsanların aradan qaldırılması üçün verilən təkliflər nəzərə alınmadığı halda isə İnzibati Xətalar Məcəlləsinə uyğun olaraq cərimə növündə inzibati tənbeh tədbirləri tətbiq olunur. Özəl sektorda isə yoxlamalar yalnız vətəndaş müraciətləri və ya mediada dərc olunan məlumatlar əsasında mümkündür:
"Əgər müraciətlərdə vətəndaşların həyat və sağlamlığı üçün birbaşa təhlükə, yoluxucu xəstəliklərin yayılması və ya epidemiya riski barədə faktlar qeyd olunursa, həmin yoxlamalar müvafiq reyestrdə qeydə alınaraq aparılır".
Kamil Dəmirli bildirib ki, ən çox şikayətlər mehmanxanalarda təmizlik və yataq dəstlərinin dəyişdirilməsi, gözəllik salonlarında isə sanitar normaların pozulması ilə bağlı olur. Onun sözlərinə görə, qaydalar otaqların dezinfeksiya edilməsini, yataq dəstlərinin mütəmadi dəyişdirilməsini və salonlarda alətlərin ya birdəfəlik istifadəsini, ya da dezinfeksiyasını tələb edir. Həmçinin dəriyə invaziv müdaxilələrin aparılması qadağandır və istifadə olunan kosmetik vasitələrin təhlükəsizliyini təsdiq edən sənədlər olmalıdır.
"Bu qaydalar infeksiyaların, o cümlədən hepatit kimi xəstəliklərin yayılmasının qarşısını almağa xidmət edir", - deyə baş hüquqşünas vurğulayıb.
Sonda o əlavə edib ki, maddi ziyanla bağlı məsələlər üzrə vətəndaşların aidiyyəti qurumlara müraciət etməsi tövsiyə olunur.
