Sonuncu zəvvar qruplarının olduğu təyyarə Bakı vaxtı ilə saat 00:20-də Heydər Əliyev Beynəlxalq Aeroportuna eniş edib.
Bu barədə Oxu.Az-a təyyarədə olan zəvvar qruplarından birinin rəhbəri Səid İsrafilov məlumat verib.
Onun sözlərinə görə, Səudiyyə Ərəbistanının Mədinə şəhərindən gələn son təyyarədə 150 sərnişin olub.
Beləliklə, Qafqaz Müsəlmanları İdarəsinin təşkil etdiyi 2026-cı il həcc missiyası başa çatıb.
"Sonuncu zəvvar qruplarının olduğu təyyarə yerli vaxtla saat 18:40-da (Bakı vaxtı ilə saat 19:40 - red.) səmaya qalxıb".
Bu barədə Oxu.Az-a Qafqaz Müsəlmanları İdarəsi (QMİ) Xarici Əlaqələr şöbəsinin müdiri, Həcc elektron sistem rəhbəri Vüsal Cahangiri məlumat verib.
Onun sözlərinə görə, son təyyarədə 150-dək sərnişin var:
"Peyğəmbərin (s) şəhəri sayılan Mədinədən səmaya qalxaraq Misir, Türkiyə və Gürcüstan üzərindən uçan təyyarənin gecəyarısından sonra Heydər Əliyev Beynəlxalq Aeroportuna enməsi planlaşdırılır".
Qeyd edək ki, builki həcc ziyarətinə zəvvarların yola salınması mayın 17-də başlayıb. Mayın 31-də zəvvarların ilk qrupu Məkkədən Bakıya qayıdıb. Yerdə qalan zəvvarlar qruplar şəklində iyunun 3-dən etibarən Mədinəyə yollanıblar. Mədinədə 3 gün qaldıqdan sonra onlar Bakıya qayıdıblar.
Xatırladaq ki, bu il həcc ziyarətində azərbaycanlı zəvvarlar üçün kvota 1 150 yer təşkil edib, bir nəfər zəvvar üçün ziyarət paketinin qiyməti 6 100 ABŞ dolları müəyyən olunub.
