Suya düşən telefonu necə bərpa etmək olar?

Telefonun suya düşməsi daxili zədələnmələrə, ekranın sıradan çıxmasına, cihazın şarj olmamasına və ya ümumiyyətlə işləməməsinə səbəb ola bilər. Buna görə də, belə bir vəziyyətlə qarşılaşdıqda, telefonunuzu necə xilas edəcəyinizi bilmək vacibdir.

Oxu.Az-ın gazeta.ru-ya istinadən verdiyi məlumata görə, rusiyalı mütəxəssis İlya Kazakov bu barədə danışıb.

Kazakov belə bir vəziyyətlə qarşılaşdığınız zaman ilk olaraq panikaya düşməməli, telefonu dərhal sudan çıxarıb təmiz parça və ya salfetlə diqqətlə qurutmağı tövsiyə edib.

"Telefon sudan çıxandan sonra işlək vəziyyətdə olarsa, onu mütləq söndürün. Onu kiliddən çıxarıb işləyib-işləmədiyini yoxlamaq istəyindən çəkinin. Bu, yenidən işləmə prosesinə mane ola bilər" , - deyə o bildirib.

Kazakov növbəti addım olaraq telefondan mümkün olan hər şeyi - örtük, qapaq, yaddaş kartları, stilus, SIM kartlar və batareyanı çıxarmağı tövsiyə edib.

"Sonra quru salfetlə hər şeyi, o cümlədən batareya bölməsini, ekranı, qoşulma portlarını silin. Cihazı ehtiyatla silkələyin - beləliklə, qulaqlıq girişi, şarj portu və dinamikdə ilişib qalan su təmizlənəcək. Xüsusi hava üfürücü ilə portlardan mayeni üfürməyə çalışa bilərsiniz. Amma fen istifadə etməyin - istilik bəzi hissələri və sxemi əridə bilər" , - deyə ekspert əlavə edib.

Kazakov nəmi aradan qaldırmaq üçün populyar bir üsul olaraq cihazı çiy düyü ilə dolu kasaya qoymağı məsləhət görüb.

"Daha etibarlı bir variant - telefonu silikagel paketləri ilə birlikdə hermetik konteynerdə saxlamaqdır. Onlar düyüdən daha yaxşı nəmi çəkir" , - deyə mütəxəssis əlavə edib.

O, cihazın tam quruması üçün yandırmadan əvvəl bir gün gözləməyi məsləhət görüb.

"Əgər zədələr minimaldırsa, cihaz yenidən işləməyə başlamalı və ya ən azı şarj olmalıdır. Eyni zamanda, nəmli telefonu ən azı beş saat ərzində şarj etməmək də vacibdir, əks halda problemi daha da ağırlaşdıra bilərsiniz" , - deyə Kazakov bildirib.

Kazakov su keçirməz hesab olunan "Apple" və "Samsung" kimi modellərin üzərinə başqa maye töküldüyü halda, zədələnmiş hissəni kranın suyu ilə yumağı tövsiyə edib.

"Lakin bu vəziyyətdə ehtiyatlı olun ki, problemi daha da ağırlaşdırmayasınız" , - deyə o xəbərdarlıq edib.

Onun sözlərinə görə, "Apple" cihazları üçün artıq mayeni çıxarmaq üçün cihazı "Lightning" və ya "USB-C" portu aşağı istiqamətə tutaraq yüngülcə vurmaq lazımdır.

"Daha sonra "iPhone"u kiçik hava axını olan quru bir yerdə saxlayın və soyuq havanı birbaşa porta üfürən ventilyatorun qarşısına qoyun - bu, prosesi sürətləndirə bilər" , - deyə mütəxəssis sözlərini yekunlaşdırıb.