"Azərbaycanda təqaüdə çıxan vəkillərin aldıqları pensiya digər qurumlarda çalışan hüquqşünasların aldıqları pensiyadan qat-qat aşağıdır. Hesab edirik ki, burada bir qeyri-bərabərlik var".
Oxu.Az xəbər verir ki, bu sözləri Vəkillər Kollegiyasının sədri Anar Bağırov qurumun Rəyasət Heyətinin geniştərkibli iclası və vəkilliyə namizədlərin andiçmə mərasimində deyib.
"Biz bununla bağlı mütəmadi olaraq aidiyyəti dövlət qurumlarına müraciət edirik, müəyyən görüşlər, danışıqlar həyata keçirik və ümid edirəm ki, dövlət qurumları bu məsələyə diqqət yetirəcəklər. Bütün hüquq peşələrində fəaliyyət göstərən insanların pensiyaları eyni meyara əsasən hesablanmalıdır. Digər hüquq peşələrində staja görə əlavələr və 60 yaşdan pensiyaya çıxmaq kimi güzəştlər nəzərdə tutulduğu halda, vəkillər bu imkanlardan yararlana bilmirlər. Vəkillik peşəsi məsuliyyət, mürəkkəblik və stress baxımından digər hüquq peşələrindən geri qalmır, əksinə, bir çox hallarda daha çətin fəaliyyət sahəsidir", - deyə sədr vurğulayıb.
