"Türk barometri" nədir?

"Beynəlxalq Türk Akademiyasının həyata keçirdiyi "Türk barometri" layihəsi ictimai rəyin öyrənilməsi üçün əhəmiyyətli mövzuları əhatə edir. Dünyanın bir çox bölgələrində müvafiq adlarla belə layihələr fəaliyyət göstərir. Bu araşdırma türk dövlətlərində milli kimlik, sosial həmrəylik və etimad mühitinin formalaşması baxımından vacibdir".

Oxu.Az xəbər verir ki, bunu Türk Akademiyası və Sosial Tədqiqatlar Mərkəzinin (STM) birgə təşkilatçılığı ilə keçirilən "Türk barometri 2024" - Türk dövlətlərində təhsil və elm sahəsində əməkdaşlıq: Mövcud reallıqlar və gələcəyə baxış" mövzusunda keçirilən beynəlxalq konfransda Türk Akademiyasının prezidenti Şahin Mustafayev deyib.

O bildirib ki, hazırkı tədqiqatda türk dövlətləri arasında elm və təhsil mövzusu müzakirə predmetidir:

"Bu araşdırmalar hər türk dövlətində ixtisaslaşmış mərkəzlərdə həyata keçirilib. Türk dövlətlərinin elm və təhsil ocaqlarında çalışan 4 131 elm və təhsil nümayəndəsinin rəyi öyrənilib. Əldə edilən mühüm nəticələrdən biri respondentlərin türk dövlətləri ilə birgə təhsil proqramının hazırlanması, müəllim-tələbə mübadiləsinin həyata keçirilməsi ilə bağlı nəticələridir. Azərbaycan respondentləri pedaqoji və tibb elmində əməkdaşlığa önəm verməklə yanaşı, ortaq tarix və ədəbiyyat, qazaxıstanlı respondentlər turizm, qırğızıstanlı respondentlər təhsildə tarix və mədəniyyət mövzularında birgə əməkdaşlığı üstün tutublar. Həmçinin respondentlər diplomların qarşılıqlı tanınmasını və elmi adların ortaq qəbul edilməsini irəli sürüblər".

Mərahim Nəsib