Bakıda "InVision Design Talks & Visionary Design" forumu keçirilir.
Oxu.Az xəbər verir ki, Türkiyənin "Seranit" və "Zivella" şirkətlərinin təşkilatçılığı ilə keçirilən forumda Azərbaycan və Türkiyənin memarlıq, sənaye dizaynı və şəhərsalma üzrə aparıcı mütəxəssisləri iştirak edirlər.
İştirakçılardan türkiyəli memar Yelin Evcen Oxu.Az-a açıqlamasında bildirib ki, bu platformada memarlığın gələcəyinə dair müzakirələr aparılır:
"Dəyişən dünyamızda insanların yeni profilli memarlıq üslublarına necə reaksiya verəcəyi haqda da söhbətlərimiz olacaq".
Azərbaycana ilk dəfə gəldiyini bildirən Y.Evcen Bakının memarlıq üslubunu və küçələrin genişliyini bəyəndiyini bildirib:
"Şəhərinizdə tarixlə müasirlik iç-içədir. Hələ ki Bakının çox yerini görməmişəm, ancaq hiss edirəm ki, bu, möhtəşəm şəhərdir".
Qeyd edək ki, "InVision Design Talks" çərçivəsində Türkiyə və Azərbaycandan bir çox şirkətlərin rəhbər heyəti çıxış edəcək.
Tədbir çərçivəsində həyatı asanlaşdıran dizayn hekayələri, həyatı formalaşdıran məkanlar, dizaynda həyat tərzi, iş və qonaqpərvərliyin inteqrasiyası; sabahı dizayn etmək; brend dəyəri, məkan kimliyi və sənaye dizaynında gündəlik əşyalar, fövqəladə təsir kimi altı mövzu müzakirə ediləcək.
Elçin Aslangil
