Ucar rayonunun Boyat kənd sakinlərinin çirkli sudan istifadəsi ilə bağlı şikayətlərinə rəsmi qurum münasibət bildirib.
Məsələ ilə bağlı Oxu.Az-ın sorğusuna cavab olaraq Azərbaycan Dövlət Su Ehtiyatları Agentliyinin (ADSEA) tabeliyində Regional Su Meliorasiya Xidmətindən bildirilib ki, Ucar rayonunun Boyat kəndində 113 hektar həyətyanı və 908 hektar pay torpaq sahəsi olmaqla, ümumilikdə 509 su istifadəçisinə xidmət göstərilir.
Qeyd olunub ki, hazırda kənd ərazisində modul tipli sutəmizləyici qurğu və ictimai su bulaqları mövcud olmadığından əhalinin kommunal-məişət məqsədli su tələbatı əsasən suvarma suyu hesabına ödənilir.
"Boyat kəndinin su təminatı Şirvan Suvarma Kanalından qidalanan R-8 paylayıcısı vasitəsilə Kəsbər kanalı ilə həyata keçirilir. Hazırda Kəsbər kanalında su təsərrüfatı infrastrukturunun yaxşılaşdırılması və suyun fasiləsiz çatdırılmasının təmin olunması məqsədilə təmir-bərpa işləri aparılır. Bu səbəbdən suyun verilişində müəyyən məhdudiyyətlər və ya qısamüddətli fasilələr yarana bilər", - açıqlamada bildirilib.
Qurumdan vurğulanıb ki, su mənbələrinin çirkləndirilməsinin qarşısının alınması, suyun keyfiyyətinin qorunması və sanitariya-gigiyena normalarına əməl olunması istiqamətində mütəmadi nəzarət tədbirləri həyata keçirilir.
Ucar rayonunun Boyat kənd sakinləri istifadə etdikləri suyun çirkli olmasından şikayətçidirlər.
Bu barədə Oxu.Az-ın qaynar xəttinə kənd sakinləri məlumat veriblər.
Onların sözlərinə görə, illərdir ərazidən keçən kanaldan gələn su müxtəlif məqsədlər üçün istifadə olunur:
"İllərdir ki, belədir. Kanaldan gələn çirkab sudan istifadə edirik. Mal-qara da o sudan içir, bəzən isə suyun içinə girirlər".
Sakinlər iddia edirlər ki, son vaxtlar kənddə bəzi insanlarda qaşınma halları artıb və bunun istifadə olunan su ilə əlaqəli ola biləcəyi ehtimal olunur.
Göndərilən videogörüntülərdə qamışlıq ərazidən keçən su kanalında bulanıq və tünd rəngli su müşahidə olunur. Kanalın bəzi hissələrində lil və çöküntü yığıntıları da görünür.
Məsələ ilə bağlı aidiyyəti quruma sorğu ünvanlanıb.
