Ukraynanın Odessa limanı yaxınlığında dron hücumuna məruz qalan, göyərtəsində azərbaycanlıların da olduğu "Ata 2" gəmisi ilə bağlı redaksiyamıza yeni məlumat daxil olub.
Gəminin ikinci kapitanının oğlu Məhəmməd Mahmudzadə Oxu.Az-a açıqlamasında bildirib ki, hazırda ekipajın vəziyyəti yaxşıdır.
Onun sözlərinə görə, hücum nəticəsində zədələnən gəmi ehtiyat idarəetmə sistemi vasitəsilə hərəkətini davam etdirir:
"Hazırda vəziyyət yaxşıdır. Gəmidə əl ilə (manual rejimdə) işləyən ehtiyat idarəetmə sistemi var, həmin sistem vasitəsilə hərəkət edirlər. Hazırda Bolqarıstan istiqamətində gedirlər. Oradan İstanbula gələcəklər, daha sonra isə gəmi təmirə aparılacaq. Gəmi heyətindən xəsarət alan olmayıb".
Ukraynada Azərbaycan dənizçilərinin olduğu gəmi bu gün dron hücumuna məruz qalıb.
Bu barədə Oxu.Az-a məlumat daxil olub.
Qeyd olunub ki, Odessa limanı yaxınlığında "Albatros Corporation" şirkətinə məxsus "ATA-2" quru yük gəmisinə üç pilotsuz uçuş aparatı (PUA) zərbə endirib və nəticədə layner ciddi ziyan görüb. Hazırda gəminin Rumıniyanın Sulina limanına yaxınlaşdığı bildirilir.
Əldə etdiyimiz məlumata görə, gəmidə 13 nəfərlik heyət olub. Onlardan biri Türkiyə, 12-si isə Azərbaycan vətəndaşıdır.
İlkin məlumata əsasən, hadisə nəticəsində ölən və ya xəsarət alan olmayıb.
Məsələ ilə bağlı aidiyyəti quruma sorğu ünvanlanıb.
