Ən son xəbərləri bizim "WhatsApp" kanalımızda izləyin

Vətəndaşlardan şikayət: "508 nömrəli marşrutun sürücüləri özbaşınalıq edirlər"
Saray qəsəbəsini Sumqayıtla birləşdirən körpü təmirə bağlanandan sonra nəqliyyatın hərəkəti çətinləşib. Redaksiyamıza müraciət edən vətəndaşların sözlərinə görə, ərazidə yeganə ictimai nəqliyyat olan 508 nömrəli marşrut avtobusları ləng işləyir.
Oxu.Az-a danışan sakinlər qeyd edirlər ki, 508 nömrəli marşrut avtobusları 10-15 dəqiqə intervalla hərəkət etməlidir, lakin sürücülər qəsdən vaxtı gecikdirirlər:
"Soruşanda deyirlər ki, bizə monitorda bildiriş gəlir, sonra hərəkət edirik. Sürücülər özbaşınalıq edirlər. Mənzil başına isə çox gec çatırlar. "20 Yanvar"dan qayıdanda da gec hərəkət edirlər. Hətta orada dayanan taksilərin konduktorları ilə əlbir olurlar. İntervalı qəsdən gecikdirirlər ki, "manatlıq"lar adam yığa bilsin. Sözügedən taksilər yolun ortasında dayanırlar, hərəkəti tamam məhdudlaşdırırlar".
Məsələ ilə bağlı məlumat almaq üçün Azərbaycan Yerüstü Nəqliyyat Agentliyinin (AYNA) Mətbuat Xidmətinə sorğu ünvanladıq:
Oxu.Az-ın sorğusuna cavab olaraq bildirilib ki, Sumqayıt şəhəri və Saray qəsəbəsini birləşdirən körpünün söküntüsü və təmir işləri ilə əlaqədar AYNA tərəfindən ərazidə müntəzəm sərnişin daşımalarını yerinə yetirən 16/19, 17, 18, 27, 503, 521, 522 və 523 nömrəli - ümumilikdə 8 avtobus marşrutunun hərəkət sxemi müvəqqəti dəyişdirilib:
"Ötən il dekabrın 18-də ictimaiyyətə dəyişikliklərlə bağlı məlumat verilib. Vətəndaşların həm Sumqayıtdan, həm paytaxt Bakıdan, həm də ətraf ərazilərdən Saray qəsəbəsinə gəlişi təmin edilib.
Dekabrın 29-dan isə vətəndaşların müraciəti və istəyi nəzərə alınaraq paytaxtın "20 Yanvar" metro stansiyasından Saray qəsəbəsinə 508 nömrəli yeni marşrut istifadəyə verilib. Marşrut xətt üzrə gündəlik 15 avtobus 10 dəqiqə, günün səhər və axşam pik saatlarında isə 8 dəqiqə hərəkət intervalı ilə sərnişinlərə xidmət göstərir. Avtobuslar təyin olunmuş qrafik üzrə hərəkət edir. Nəqliyyat vasitələrinin başlanğıc və son dayanacaq məntəqələrindən çıxışında hər hansı bir yubanma qeydə alınmayıb. Qeyd edək ki, paytaxtın çıxışında müşahidə edilən nəqliyyat sıxlığı avtobusların hərəkət intervalının artması ilə nəticələnə bilir.
Qaldırılan iddialarla bağlı isə araşdırma aparılıb. Qeyd olunan hal təsdiqini tapmayıb".
Məhərrəm Əliyev
"Azərbaycan Yerüstü Nəqliyyat Agentliyi (AYNA)" teqi üzrə xəbərlər
- Yük maşınları yeni qaydada yoxlanılacaq
- Sumqayıt sakinləri 12A və 30 nömrəli marşrut avtobuslarından ŞİKAYƏTÇİDİRLƏR
- Vətəndaşlar 594 nömrəli marşrut üzrə avtobus tapmaqda çətinlik çəkirlər - AYNA tapşırıq verib
- Bakıda iki avtobus marşrutunun hərəkət sxemi müvəqqəti DƏYİŞDİRİLDİ
- Badamdar sakinlərinin ictimai nəqliyyat problemi: Köhnə avtobuslar və yorucu intervallar