“digital.login” vahid giriş sistemi rəqəmsal xidmətləri vətəndaşlar üçün əlçatan edir

Ölkəmizdə rəqəmsal hökumət mexanizmlərinin təşəkkülündə vətəndaşyönümlü həllərə əsaslanan yanaşma aparıcı rol oynayır.  Bu yanaşmanın tərkib hissəsi olaraq İnnovasiya və Rəqəmsal İnkişaf Agentliyi “digital.azerbaijan” brendi altında rəqəmsal xidmətlərə vahid giriş sistemi - “digital.login” platformasının təkmilləşdirilmiş yeni versiyasını istifadəyə verib.   

Bu versiyada “digital.login” vətəndaşların rahat istifadəsi üçün iki əsas funksionallığı təqdim edir. Vətəndaşlar ilk növbədə sistemə inteqrasiya edilmiş 140-dan çox rəqəmsal xidmətdən vahid giriş vasitəsilə istifadə imkanı əldə edirlər. Digər mühüm funksionallıq isə vətəndaşın özü haqqında olan məlumatların qurumlar tərəfindən istifadəsinə razılıqvermə səlahiyyətini idarə edə bilməsidir. Qeyd edək ki, vətəndaşlar “myGov” portalında artıq bu funksiyadan istifadə edə bilirlər.

“digital.login” həlli fiziki şəxslərlə (vətəndaşlar) yanaşı, eyni zamanda, hüquqi şəxslərin də istifadəçi təcrübəsini optimallaşdırır. Vətəndaş tərəfindən razılığın idarə olunması ilə qurumlar vətəndaş razılığı əsasında onlara tələb olunan məlumatları rahatlıqla sorğulamaq imkanı əldə edirlər.

Bütün bu funksionallıqlar dövlət-vətəndaş münasibətlərində səmərəlilik və məmnuniyyət baxımından yeni səhifə açır. Belə ki, “digital.login” vətəndaşların rəqəmsal xidmətlərdən istifadəsi üçün 5 mövcud autentifikasiya, yəni vətəndaşın kimliyinin tanınması üsullarını sadələşdirir və bu prosesi daha təhlükəsiz edir. Bu, vətəndaşın vaxtına qənaət edərək müxtəlif rəqəmsal xidmət portallarına girişi yüksək səviyyədə optimizasiya edir və vətəndaş məmnuniyyətini artırır. Bununla yanaşı, vətəndaş özü haqqında olan məlumatların etibarlı mühitdə saxlanıldığından da əmin olur, çünki “digital.login” gücləndirilmiş təhlükəsizliyi ilə bu imkanı yaradır.