"PAŞA Holding"in təşkilatçılığı, "PAŞA Bank Gürcüstan"ın dəstəyi ilə "INMerge" İnnovasiya Sammitinin ilk regional tədbiri Tiflis şəhərində uğurla başa çatıb. 150-dən çox iştirakçının, o cümlədən aparıcı sahibkarların, investorların və ekosistem iştirakçılarının bir araya gəldiyi tədbir, korporativ innovasiya, startapların inkişafı və investisiya imkanları üzrə müzakirələr üçün cəlbedici bir mühit təqdim edib.
Tədbirin əsas məqamlarından biri "İşgüzar İnkişaf üçün İnnovasiya - Korporativ Strategiya və Ekosistem Dinamikası Arasında Körpü Qurmaq" mövzusunda keçirilən panel müzakirəsi olub. "PASHA Bank Gürcüstan"ın Biznes İnkişafı Departamentinin rəhbəri Maka Gvritishvilinin moderatorluğu ilə keçirilən müzakirəyə Pedro Santos Vieira - "500 Global" şirkətinin tərəfdaşı, Iro Tsagareishvili - "AXEL" şirkətinin icraçı direktoru, Nino Chedia - "United Payment Georgia"nın icraçı direktoru, Zviad Tsotskolauri - "Signify" şirkətinin CEO-su, eləcə də Lika Merabishvili - "StrategEast" şirkətinin Qafqaz üzrə regional direktoru kimi nüfuzlu ekspertlər qatılıblar. Panel müzakirəsində innovasiyanın işgüzar inkişafdakı rolu müzakirə olundu və korporativ strategiyalarla startap ekosistemi arasında daha güclü əlaqələrin qurulmasının vacibliyi vurğulanıb.
Tədbirin digər bir əsas məqamı isə Gürcüstanın ən ümidverici startaplarını nümayiş etdirmək üçün təşkil olunan "INbattle" startap müsabiqəsi olub. 50-dən çox startapın müraciət etdiyi müsabiqəyə böyük maraq göstərilib. Seçim prosesindən sonra yalnız 10 startap həllərini münsiflər heyətinə təqdim etmək üçün seçilib, onlardan bir startap qalib gəlib.
Qeyd edək ki, Gürcüstandan əlavə, "PAŞA Holding" "INMerge" İnnovasiya Sammitinin regional tədbirlərini digər ölkələrdə də keçirməyi planlayır. Eləcə də, əsas təbdir Bakıda sentyabr ayında baş tutacaq və ətraflı məlumat bir müddət sonra paylaşılacaq.
Tədbir barədə daha ətraflı məlumat üçün www.inmerge.az ünvanına keçid edə bilərsiniz.
