ABŞ Dövlət Departamenti İspaniyanın muxtar Seuta şəhərində baş verən kütləvi miqrant axınını "suverenliyin və insan hüquqlarının pozulması" adlandırıb.
Oxu.Az xəbər verir ki, bu barədə qurumun "X" sosial şəbəkəsindəki paylaşımında bildirilib.
"Bu qəbuledilməz insident İspaniya hökumətinin Avropaya kütləvi qanunsuz miqrasiyanı təşviq etməyə yönəlmiş məqsədyönlü səylərinin birbaşa nəticəsidir", - deyə Dövlət Departamentinin açıqlamasında qeyd olunub.
Qeyd edək ki, Seuta Afrikanın Aralıq dənizi sahilində yerləşən və Mərakeşlə sərhədi olan muxtar bölgədir.
İyulun 30-31-də Afrikadan olan onminlərlə miqrant qanunsuz şəkildə sərhədi keçib, daha sonra dəniz yolu ilə İspaniyanın Avropa hissəsinə çatmağa çalışıb. Son məlumatlara görə, ən azı 57 nəfər həlak olub.
Madrid miqrant axınının qarşısını almaq üçün Seutaya hərbçilər göndərib.
