ABŞ Hərbi Dəniz Qüvvələri İrandan cənub-şərqdə, Ərəbistan dənizi sularında "USS Princeton" adlı raket kreyserini (okean və dənizlərdə təkbaşına və ya qrup halında döyüş tapşırıqlarını yerinə yetirmək üçün nəzərdə tutulmuş iri və çoxfunksiyalı hərbi gəmi tipidir - red.) dislokasiya edib.
Oxu.Az xəbər verir ki, bu barədə ABŞ Hərbi Dəniz İnstitutunun informasiya xidməti məlumat yayıb.
Yaxın Şərqdəki Mərkəzi Komandanlığın (CENTCOM) gəmi qruplaşmasına daxil olan bu hərbi gəmi ümumilikdə 122 raket daşımaq qabiliyyətinə malikdir. Onların arasında 1.6 min km mənzilli 26 "Tomahawk" qanadlı raketi, 16 ASROC sualtı qayıqlara qarşı idarəolunan raket və 80 ədəd "Standard-2" və "Standard-3" zenit-raket kompleksi var.
İrana qarşı hərbi əməliyyatların keçirilməsi zamanı CENTCOM rəhbərliyinin sərəncamında bu dərəcədə güclü döyüş gəmisi mövcud olmayıb.
Vaşinqtonla Tehran arasında memorandum imzalanmasına baxmayaraq, Ərəbistan dənizində hələ də ABŞ Hərbi Dəniz Qüvvələrinin nəhəng hərbi vasitələri qalmaqdadır.
Bu qrupun tərkibində göyərtəsində 100-dən çox qırıcı olan iki təyyarədaşıyan, bir kreyser, 13 raket esminesi və dəniz piyadaları ekspedisiya taborunu daşıyan dörd böyük desant gəmisi yer alır.
Bir müddət əvvəl CENTCOM rəsmiləri bəyan etmişdilər ki, ABŞ qoşunları bütün region boyu havada, quruda və dənizdə öz iştirakını davam etdirir.
