Almaniyada "Patriot" sistemlərinin saxlanıldığı hərbi bazanın üzərində naməlum dronlar müşahidə edilib.
Oxu.Az bildirir ki, bu barədə "Süddeutsche Zeitung" nəşri polisdəki mənbələrə istinadən məlumat yayıb.
Almaniyanın şimalındakı Mexernix şəhərində yerləşən Bundesverin hərbi bazası üzərində naməlum pilotsuz uçuş aparatları (PUA) qeydə alınıb. Məlumata görə, bazada silah-sursat anbarı yerləşir, həmçinin "Patriot" hava hücumundan müdafiə sistemlərinin təmiri həyata keçirilir.
Məxfi polis hesabatına istinadən bildirilir ki, Mexernixdə fəaliyyət göstərən özəl mühafizə şirkətinin əməkdaşları cümə axşamı axşam saatlarından cümə günü səhərədək ümumilikdə altı dron uçuşu qeydə alıblar.
Hüquq-mühafizə orqanlarının əməkdaşları avqustun 7-də axşam saatlarında səmada iriölçülü PUA müşahidə etdiklərini bildiriblər. Onların sözlərinə görə, dron bir müddət polis əməkdaşlarının üzərində dövrə vurub. İlkin ehtimallara əsasən, müşahidə edilən aparat qanad açıqlığı 3,8 metrə çatan "Fly-380 VTOL" tipli dron ola bilər.
Qeyd olunur ki, Mexernixdəki Bundesver bazası "Patriot" sistemlərinin saxlanıldığı və təmir olunduğu əsas obyektlərdən biri hesab edilir. Təxminən 30 min kvadratmetr sahəni əhatə edən anbar hərbi dairələrdə "Patriot gəmiqayırma zavodu" və "ordunun xəzinəsi" kimi tanınır.
Hadisə ilə bağlı araşdırma aparılır.
