Argentinanın Entre-Rios əyalətinin deputatı Xuan Manuel Rossi bilavasitə parlamentin iclası zamanı kokain qəbul etməkdə günahlandırılıb.
Oxu.Az xəbər verir ki, bu barədə "Diario Huarpe" nəşri məlumat yayıb.
Qalmaqala səbəb siyasətçinin sosial şəbəkələrdə geniş yayılan videogörüntüsü olub. Kadrlarda Rossinin əlində naməlum əşya tutduğu, daha sonra barmaqlarını burnuna yaxınlaşdıraraq başını arxaya əyib kresloya söykəndiyi əks olunur. Bir çox istifadəçilər deputatın məhz bu anda qadağan olunmuş maddəni burnuna çəkdiyini iddia ediblər.
Siyasətçinin özü isə bu ittihamları qəti şəkildə rədd edib. O, əlində narkotik yox, sadəcə qələm olduğunu bildirib.
Rossi günahsızlığını sübut etmək üçün müvafiq ekspertizadan keçməyə hazır olduğunu da vurğulayıb.
"Sosial şəbəkələrdə mənə qarşı qarayaxma kampaniyası aparılır. Bunun məqsədi mənə "narkoman" damğası vurmaqla nüfuzuma xələl gətirməkdir", - deyə deputat "X" platformasında qeyd edib.
Rossinin fikrincə, bu cür ittihamların yayılması onun siyasi imicini sarsıtmağa yönəlmiş planlı addımdır. Hələlik əyalət parlamentinin rəhbərliyi tərəfindən məsələ ilə bağlı əlavə rəsmi açıqlama verilməyib.
