Böyük Britaniya Silahlı Qüvvələrində hərbi əməliyyatlar zamanı atlardan istifadə imkanları nəzərdən keçirilir. Buna səbəb dronların at belindəki hərbçini müəyyən etməsinin daha çətin olmasıdır.
Oxu.Az xəbər verir ki, bu barədə "The Daily Mail" qəzeti hərbçilərə istinadən məlumat yayıb.
Nəşrin yazdığına görə, Saray Süvari Alayı dərəli-təpəli və keçilməsi çətin ərazilərdə gizli hərəkət etmək üçün atlardan istifadə üzrə sınaqlar keçirir.
Materialda qeyd olunur ki, eksperiment çərçivəsində atlar ənənəvi hərbi texnikanın keçməsinin çətin olduğu və ya hərəkət zamanı həddindən artıq səs-küy yaradacağı mürəkkəb meşəlik və bataqlıq əraziləri qət ediblər.
Polkovnik-leytenant Ben Maknilin sözlərinə görə, dron atı böyük ehtimalla vəhşi təbiətin bir hissəsi hesab edəcək və ona hücum etməyəcək.
"At istənilən zirehli maşından daha gizli şəkildə hərəkət edə bilər. At belində A nöqtəsindən B nöqtəsinə çatmaq şansınız "Challenger 2" tankında olduğundan daha yüksəkdir", - deyə hərbçi bildirib.
