Böyük Britaniya Silahlı Qüvvələrinin Baş Qərargah rəisi Riçard Nayton bildirib ki, hazırda ölkə üçün risk və təhdidlər Soyuq müharibənin başa çatmasından bəri ən yüksək səviyyəyə çatıb.
Oxu.Az xəbər verir ki, bu barədə o, BBC Radio 4-ün efirində danışıb.
"Bu mənim xatırladığım ən təhlükəli dövrdür", - deyə R.Nayton bildirib.
Onun sözlərinə görə, Rusiya Böyük Britaniyanın müdafiə sistemini "yoxlayır, sınağa çəkir və çağırış edir", eyni zamanda vəziyyəti daha da gərginləşdirərək təhlükəli həddi keçmək riski yaradır.
Nayton qeyd edib ki, Britaniya ordusu son onilliklərdə əsasən qısamüddətli münaqişələrə hazırlaşıb. Lakin indi ölkə daha uzunmüddətli müharibələrə hazır olmalıdır.
"Biz müdafiəyə daha çox vəsait ayırmalı və bunu daha sürətlə etməliyik. Resursların yenidən bölüşdürülməsi ilə bağlı çətin qərarlar qəbul etmək nazirlərin vəzifəsidir", - deyə o vurğulayıb.
Baş Qərargah rəisi həmçinin Rusiyanın uzaqmənzilli aviasiyasının Uzaq Şimal bölgəsində fəallığının artdığını bildirib.
Böyük Britaniyanın Baş naziri Kir Starmer bir gün əvvəl bəyan edib ki, həm Britaniya kəşfiyyatı, həm də NATO-nun bəzi üzvləri Rusiyanın artıq 2030-cu ildə alyansa hücum edə biləcəyini istisna etmirlər. Onun sözlərinə görə, bu, müdafiə xərclərinin artırılmasının təcili və prioritet məsələ olduğunu göstərir.
NATO rəhbərliyi də daha əvvəl dəfələrlə Rusiya ilə mümkün qarşıdurma riskindən narahatlığını ifadə edib. Alyansın baş katibi Mark Rütte üzv ölkələri Moskvanın yaratdığı təhlükə qarşısında "sadəlövh olmamağa" və müdafiə xərclərini artırmağa çağırıb.
