Rusiya İstintaq Komitəsi Dərbənddəki kilsə və sinaqoqa hücumda ittiham olunan Maqomed Kaqirovun işi üzrə istintaqı başa çatdırıb.
Oxu.Az-ın məlumatına görə, bu barədə TASS-a hüquq-mühafizə orqanlarından bildirilib.
"Hazırda tərəflər cinayət işinin materialları ilə tanış olurlar", - deyə agentliyin həmsöhbəti bildirib.
Xatırladaq ki, iyunun 23-də Mahaçqala və Dərbənddə pravoslav kilsələrinə, sinaqoqlara və yol-patrul xidmətinin postuna silahlı hücumlar həyata keçirilib. Hadisə zamanı 22 nəfər, o cümlədən 17 asayiş keşikçisi və biri protoierey (baş keşiş) Nikolay Kotelnikov həlak olub. Antiterror əməliyyatı zamanı ikisi Dərbənddə, üçü isə Mahaçqalada olmaqla beş silahlı zərərsizləşdirilib.
Hücum zamanı biri şəhərsalma və memarlıq abidəsi olmaqla iki sinaqoq yandırılıb, daha iki pravoslav kilsəsi də zərər görüb.
Hadisə ilə bağlı "Terrorizm" maddəsi üzrə cinayət işi açılıb, Kaqirov Rusiya Cinayət Məcəlləsinin "insanın ölümünə səbəb olan terror aktı" maddəsi ilə ittiham olunur. Onun həbs müddəti 23 may 2025-ci ilədək uzadılıb.
