ABŞ Prezidenti Donald Tramp "Truth Social" şəbəkəsində süni intellekt tərəfindən yaradılmış maraqlı video paylaşıb. Görüntülərdə həkim rolunda olan Tramp Hollivud ulduzlarına "Trampı qəbul etməmə sindromu" diaqnozunu qoyur.
Oxu.Az-ın xəbərinə görə, bu barədə "The Independent" yazıb.
90 saniyəlik videoda Trampı daha əvvəl tənqid edən aktyorlar Vupi Qoldberq, Robert De Niro, Culiya Roberts, Rozi O'donnell, Edvard Norton və Con Lequizamonun rəqəmsal klonları prezidentin siyasətindən qaynaqlanan "simptomlardan" - depressiya, həyəcan və qocalmadan şikayətlənirlər. De Nironun süni intellekt versiyası deyir ki, Tramp üzündən o nə yeyə, nə də yata bilirdi və ətrafındakıların əziyyət çəkməsinə səbəb olurdu. Virtual Roberts iddia edir ki, iki il ərzində o, 20 yaş qocalıb və gələcək üçün narahat olmağa başlayıb. Virtual O'donnell iddia edir ki, 10 ildən çoxdur bu sindromdan əziyyət çəkir, Qoldberqin klonu isə öz vəziyyətini ümidsiz adlandırır.
Şikayətlərini dinlədikdən sonra "Doktor Tramp" məşhurlara xəstəlikdən "müalicə" təklif edir.
"Saxta xəbərlərdən uzaq durun. Dua edin və əgər nə vaxtsa narahatlıq hiss etsəniz, sadəcə diyetik kola için, mənim kimi. Və siz həyatınızda gözəl dəyişikliklər görəcəksiniz", - deyə siyasətçi bildirir.
Qeyd edək ki, videoda göstərilən məşhurlardan bir çoxu Trampı açıq şəkildə tənqid edib. De Niro onu "azadlıq və təhlükəsizliyə ekzistensial təhdid" adlandırıb. Qoldberq iddia edib ki, Tramp "ömürlük diktator" olmaq istəyir. O'donnell və Tramp isə 2006-cı ildən bəri mübahisə edirlər və KİV-də müntəzəm olaraq bir-birinə qarşı sərt bəyanatlar səsləndirirlər.
