Ermənistanın ictimai xidmətlərin tənzimlənməsi komissiyası (ölkənin elektrik enerjisi və digər kommunal xidmətlər üzrə tənzimləyicisi) daha əvvəllər İrəvanda həbs edilmiş rusiyalı iş adamı Samvel Karapetyana məxsus olan "Ermənistan elektrik şəbəkələri" şirkətinin lisenziyasını ləğv edib.
Oxu.Az bu barədə "Sputnik Ermənistan"a istinadən xəbər verir.
Məlumata görə, qərar üç gün davam edən növbədənkənar komissiya iclasından sonra qəbul edilib.
Komissiyanın beş üzvündən dördü şirkətin lisenziyasının ləğv edilməsinin lehinə səs verib. Komissiya tərəfindən təqdim edilən layihəyə əsasən, qərar 21 noyabr 2025-ci ildə qüvvəyə minəcək.
Xatırladaq ki, "Ermənistanın elektrik şəbəkələri" şirkəti 2016-cı ildən bəri rusiyalı erməni iş adamı Samvel Karapetyanın təsis etdiyi "Taşir" şirkətlər qrupuna məxsusdur. Ermənistanın baş naziri Nikol Paşinyan Karapetyanın evində axtarış aparıldıqdan və həbs edildikdən sonra şirkətin milliləşdirilməsi niyyətində olduğunu açıqlayıb. Daha sonra Ermənistan prezidenti Vaaqn Xaçaturyan parlament tərəfindən qəbul edilmiş və "Ermənistan elektrik şəbəkələri"nin dövlət nəzarətinə qaytarılmasını nəzərdə tutan qanunvericiliyə düzəlişləri imzalayıb.
