Fransa parlamentinin aşağı palatası sağalmaz xəstəlikləri olan insanlarln həyatına son vermək üçün evtanaziyaya icazə verən qanun layihəsini qəbul edib.
Oxu.Az-ın "France 24" telekanalına istinadla verdiyi xəbərə görə, qanun layihəsi 305 lehinə və 199 əleyhinə səslə təsdiqlənib. Sənəd bundan sonra parlamentin yuxarı palatasında müzakirə olunacaq.
Qeyd olunur ki, yekun qərarın qəbulu bir qədər vaxt ala bilər. Məlumata əsasən, evtanaziyadan yalnız 18 yaşdan yuxarı şəxslər istifadə edə biləcəklər. Bununla belə, bu şəxslər Fransa vətəndaşı olmalı və ya ölkədə daimi yaşamalıdırlar.
Əlavə olaraq, evtanaziya üçün bir qrup tibb mütəxəssisi xəstənin sağalmaz, son mərhələdə olan xəstəliyini və dözülməz ağrılarını təsdiqləməlidir. Lakin ağır psixi xəstəlikləri və ya neyrodegenerativ pozğunluqları (məsələn, Altsheymer xəstəliyi) olan şəxslərə evtanaziyaya icazə verilməyəcək.
Qeyd edək ki, hazırda evtanaziya qanunvericiliyi Kanada, Belçika və Niderlandda mövcuddur.
