Fransanın mərkəzi hissəsində yerləşən Sen-Pyer-de-Kor kommunasında baş verən iğtişaşlar zamanı səkkiz polis əməkdaşı xəsarət alıb, beş nəfər saxlanılıb.
Oxu.Az BFMTV telekanalına istinadən xəbər verir ki, iğtişaşlar sentyabrın 19-da axşam saatlarında polisin motosikletlərlə səs-küylü yürüşlər təşkil edən bir qrup şəxslə bağlı daxil olan şikayətlər əsasında Rabatri rayonuna gəlməsindən sonra başlayıb.
Hüquq-mühafizə orqanlarının əməkdaşları bir neçə yoxlama aparmağa cəhd ediblər. Sürücülərdən birinin polisin tələblərini yerinə yetirməkdən imtina etməsindən sonra patrul avtomobili motosikletlə toqquşub. Qəzanın təfərrüatı hələlik müəyyən edilməyib.
Motosikletçi ayağından xəsarət alaraq xəstəxanaya çatdırılıb. Onun həyatı üçün təhlükə yoxdur. Avtomobili idarə edən polis əməkdaşı nəzarət altına alınıb.
Yol-nəqliyyat hadisəsindən sonra bölgədə vəziyyət gərginləşib. Onlarla şəxs asayiş keşikçilərinə pirotexniki vasitələr atıb, polisin iki xidməti avtomobili və yerli sakinlərə məxsus iki avtomobil yandırılıb.
Ərazidə asayişi sentyabrın 20-si saat 4 radələrində (Bakı vaxtı ilə saat 6 radələri - red.) bərpa etmək mümkün olub. Mülkiyyətə zərər vurmaqda şübhəli bilinən beş nəfər saxlanılaraq nəzarət altına alınıb.
