Fransanın sabiq baş naziri Sebastyen Lekornyu istefasının səbəbini açıqlayıb.
Oxu.Az-ın "The Washington Post" qəzetinə istinadla verdiyi məlumata görə, S.Lekornyu bu addımı ölkədəki qütbləşmiş siyasi qüvvələr arasında kompromis əldə edə bilmədiyi üçün atdığını bildirib.
"Baş nazir olmaq çətin vəzifədir, xüsusilə də hazırkı şəraitdə", - deyə siyasətçi qeyd edib.
O, irəli getməyə çalışdığını, lakin partiyaların "iştahasının" razılıq əldə etməyi mümkünsüz hala gətirdiyini vurğulayıb.
"Hər bir siyasi partiya elə davranır ki, guya parlamentdə çoxluğa malikdir", - deyə Lekornyu əlavə edib.
Sebastyen Lekornyu Beşinci Respublika tarixində ən qısa müddət vəzifədə qalan baş nazir kimi tarixə düşüb.
Oxu.Az bu barədə "The New York Times"a istinadla xəbər verir.
Bildirilir ki, Fransanın yeni Nazirlər Kabineti, iki ildən az fəaliyyət göstərən əvvəlki iki hökumətin tərkibi ilə xeyli oxşarlıq təşkil edir. Bu isə yeni hökumətin sabitliyi ilə bağlı suallar doğurur.
Qeyd edək ki, ondan əvvəl bu antirekord Mişel Barnyeyə məxsus idi - o, cəmi üç aydan bir qədər artıq müddətdə hökumətə rəhbərlik etdikdən sonra istefa vermişdi.
Xatırladaq ki, Sebastyen Lekornyu bundan əvvəl Fransanın müdafiə naziri vəzifəsini icra edib və sentyabrın 9-da baş nazir təyin olunmuşdu.
Fransanın Baş naziri Sebastyen Lekornyu istefa verib.
Oxu.Az bu barədə "Le Figaro" qəzetinə istinadla xəbər verir.
Bildirilir ki, hökumət başçısı istefa ərizəsini ölkə prezidentinə təqdim edib və sənəd qəbul olunub.
Qeyd edək ki, Fransada artıq yeni hökumətin tərkibi açıqlanıb. Müdafiə Nazirliyinə bundan əvvəl iqtisadiyyat və maliyyə naziri vəzifəsini icra edən Bryuno Le Mer rəhbərlik edəcək. Xarici işlər naziri postunu isə Jan-Noel Barro qoruyub saxlayıb.
Bununla yanaşı, mədəniyyət, ədliyyə, səhiyyə, kənd təsərrüfatı və daxili işlər nazirləri də vəzifələrində qalıblar.
